راولپنڈی: معرکۂ حق کے لازوال ہیروز کی قربانیوں اور وطن کے لیے ان کی انمول وفاداری کے اعزاز میں ایک انتہائی جذباتی اور خصوصی ملی نغمہ “اپنی جاں نذر کروں، اپنی وفا پیش کروں” جاری کر دیا گیا ہے۔ یہ نغمہ ان بہادر سپوتوں کی جرات اور مادرِ وطن کے ساتھ ان کے گہرے رشتے کی ایک ایسی دلکش داستان ہے جو ہر محبِ وطن کی آنکھیں نم کر دیتی ہے۔
اس گانے کے ذریعے ان جوانوں کی بے مثال شجاعت کو سراہا گیا ہے جنہوں نے مئی 2025 کے معرکہ حق میں اپنی جانوں کا نذرانہ پیش کر کے ملک کا دفاع کیا اور دشمن کے ناپاک عزائم کو خاک میں ملا دیا۔ یہ ملی نغمہ صرف ایک ترانہ نہیں، بلکہ شہداء کے ساتھ پوری قوم کے عہدِ وفا کی ایک جذباتی علامت ہے۔
ترانے کے بول اور موسیقی کو اس انداز سے ترتیب دیا گیا ہے کہ یہ سننے والوں میں حب الوطنی کے جذبے کو اجاگر کرتی ہے۔ یہ نغمہ اس عزم کو دہراتا ہے کہ پاکستانی عوام اور افواجِ پاکستان “بنیانٌ مرصوص” کی طرح اپنے شہداء کے شانہ بشانہ کھڑے ہیں اور ان کی قربانیوں کو تاریخ میں ہمیشہ سنہری الفاظ میں یاد رکھا جائے گا۔
ملی نغمے کی ریلیز کے بعد سے سوشل میڈیا پر بھی شہداء کو زبردست خراجِ عقیدت پیش کیا جا رہا ہے، اور صارفین کی جانب سے اسے بے حد سراہا جا رہا ہے۔ یہ خوبصورت اور خصوصی ترانہ شہداء کی لازوال محبت، ایثار اور قربانیوں کو ہمیشہ زندہ رکھے گا۔
دیکھئیے:خوارج کے ڈرون حملے انسانیت پر وار ہیں: معصوم شہریوں کے قتل پر علامہ طاہر اشرفی کی شدید مذمت