بلوچستان: مستونگ کے علاقے کھڈکوچہ کے باغ میں دھماکے کے نتیجے میں 6 افراد جاں بحق اور 3 زخمی ہو گئے۔
پولیس کے مطابق تمام ہلاک و زخمی افراد باغات میں کام کرنے والے مزدور تھے۔ لاشوں اور زخمیوں کو فوری طور پر مستونگ ہسپتال منتقل کر دیا گیا۔
مقامی افراد کے مطابق دھماکے کی شدت اتنی تھی کہ اس کی آواز دور دراز کے علاقوں میں بھی سنی گئی، جس سے علاقے میں خوف و ہراس پھیل گیا۔
واقعے کی اطلاع ملتے ہی پولیس اور قانون نافذ کرنے والے ادارے کے اہلکار موقع پر پہنچ گئے اور علاقے کو گھیرے میں لے لیا۔ بم ڈسپوزل اسکواڈ کو بھی طلب کر لیا گیا ہے تاکہ دھماکے کی نوعیت کا تعین کیا جا سکے۔
پولیس کے مطابق کھڈکوچہ کے علاقے میں ہی نامعلوم افراد کی فائرنگ سے 2 مزید افراد جاں بحق ہو گئے۔ فائرنگ کرنے والے موقع سے فرار ہو گئے، جبکہ لاشوں کو ہسپتال منتقل کر دیا گیا۔
حکام کی جانب سے واقعے کی مکمل نوعیت اور اس میں ملوث عناصر کے بارے میں تاحال باضابطہ تفصیلات سامنے نہیں آئیں۔ سیکیورٹی اداروں نے علاقے میں نگرانی اور سرچ آپریشن مزید سخت کر دیا ہے۔
دیکھیے: خیبر: شہریوں نے مبینہ افغان ٹی ٹی پی کارندے کو چوری کرتے پکڑ لیا
