وفاق المدارس العربیہ پاکستان کے قائدین نے اسلام آباد کی ایک امام بارگاہ میں ہونے والے خودکش حملے کو افسوسناک، سفاکانہ اور قابلِ شدید مذمت قرار دیتے ہوئے کہا ہے کہ بے گناہ انسانوں کی جان لینا اور خون بہانا کسی صورت اسلام یا انسانیت میں جائز نہیں۔
صدر وفاق المدارس العربیہ پاکستان مولانا مفتی محمد تقی عثمانی، سینئر نائب صدر مولانا انوار الحق، ناظمِ اعلیٰ مولانا محمد حنیف جالندھری اور دیگر رہنماؤں نے مشترکہ بیان میں کہا کہ مساجد، امام بارگاہوں اور دینی مدارس جیسے مقدس مقامات کو نشانہ بنانے والے عناصر انسان کہلانے کے بھی مستحق نہیں۔ ان کا کہنا تھا کہ عبادت گاہوں میں خون ریزی دراصل پاکستان کو عدم استحکام سے دوچار کرنے کی ایک منظم سازش ہے۔
وفاق المدارس کے قائدین نے اس بات پر زور دیا کہ اس خونریز اور ظالمانہ کارروائی میں ملوث عناصر اور ان کے سہولت کاروں کے مکمل نیٹ ورک کا سراغ لگا کر انہیں قانون کے کٹہرے میں لایا جائے اور نشانِ عبرت بنایا جائے، تاکہ آئندہ ایسے بزدلانہ واقعات کی حوصلہ شکنی ہو۔
انہوں نے حکومت اور متعلقہ اداروں سے مطالبہ کیا کہ ملک بھر کی تمام مساجد، امام بارگاہوں اور دینی مدارس کو فول پروف سیکیورٹی فراہم کی جائے، تاکہ عبادت گزار بلا خوف و خطر اپنے مذہبی فرائض ادا کر سکیں۔
وفاق المدارس العربیہ پاکستان کے رہنماؤں نے شہداء کے اہل خانہ سے دلی تعزیت کا اظہار کیا اور زخمیوں کی جلد صحت یابی کے لیے دعا بھی کی۔ انہوں نے اس عزم کا اعادہ کیا کہ دینی طبقہ ہر قسم کی دہشت گردی، انتہاپسندی اور فرقہ وارانہ تشدد کے خلاف متحد ہے اور پاکستان کے امن، استحکام اور مذہبی ہم آہنگی کے لیے اپنا کردار ادا کرتا رہے گا۔
دیکھیے: اسلام آباد کی امام بارگاہ میں خودکش دھماکہ، 31 افراد جاں بحق، 169 زخمی