لاہور: پاکستانی اداکارہ میرا نے ایک پوڈکاسٹ میں نامناسب اور ذاتی نوعیت کے سوالات پر احتجاجاً انٹرویو ادھورا چھوڑ دیا، جس کے بعد سوشل میڈیا پر اس واقعے نے نئی بحث چھیڑ دی ہے۔
تفصیلات کے مطابق میرا ان دنوں اپنی آنے والی فلم “سائکو” کی تشہیر میں مصروف ہیں، جو عیدالاضحیٰ پر ریلیز ہوگی۔ فلم میں شان شاہد مرکزی کردار ادا کر رہے ہیں جبکہ میرا ٹائٹل رول میں نظر آئیں گی۔ اسی سلسلے میں وہ مختلف انٹرویوز اور پوڈکاسٹس میں شرکت کر رہی ہیں۔
حال ہی میں ایک پوڈکاسٹ کے دوران میزبان کی جانب سے اداکارہ سے ان کی ذاتی زندگی اور ماضی سے متعلق متنازع سوالات کیے گئے، جن پر میرا نے بارہا گفتگو کو اپنی فلم کی طرف موڑنے کی کوشش کی، تاہم میزبان مسلسل حساس موضوعات پر سوالات کرتے رہے۔
ذرائع کے مطابق صورتحال اس وقت مزید کشیدہ ہو گئی جب میزبان نے طنزیہ انداز اختیار کرتے ہوئے اداکارہ سے غیر مناسب جملے بھی کہے، جس پر میرا نے خاموشی اختیار کرتے ہوئے انٹرویو ادھورا چھوڑنے کا فیصلہ کیا۔
اس واقعے پر اداکارہ مشی خان نے بھی ردعمل دیتے ہوئے کہا کہ ایک سینئر صحافی کو اس طرح کے ذاتی اور غیر ضروری سوالات سے گریز کرنا چاہیے تھا، خاص طور پر جب مہمان واضح طور پر اس سے گریز کر رہا ہو۔
سوشل میڈیا پر بھی صارفین کی بڑی تعداد نے اس انٹرویو کو تنقید کا نشانہ بنایا، جہاں کچھ نے میزبان کے رویے کو غیر پیشہ ورانہ قرار دیا جبکہ دیگر نے میرا کے فیصلے کی حمایت کی۔
تجزیہ کاروں کے مطابق یہ واقعہ ایک بار پھر اس سوال کو اجاگر کرتا ہے کہ انٹرویوز میں حدود اور پیشہ ورانہ اخلاقیات کا خیال رکھنا کیوں ضروری ہے، خاص طور پر جب بات فنکاروں کی ذاتی زندگی سے جڑی ہو۔
دیکھئیے:شاہ رخ خان کے ساتھ پرفارمنس کیلئے کونسی دو واضح شرائط رکھیں؟ ریما خان نے قصہ سنا دیا