لاہور: پاکستان کی معروف اداکارہ ریما خان نے لندن میں بالی ووڈ سپر اسٹار شاہ رخ خان کے ساتھ اسٹیج پرفارمنس کے دوران اپنی دو اہم شرائط کا انکشاف کر دیا، جنہیں انہوں نے اپنی ثقافت اور قومی شناخت سے جوڑا۔
ریما خان نے ایک پوڈکاسٹ میں گفتگو کرتے ہوئے بتایا کہ لندن میں ہونے والی ایک پرفارمنس کے دوران شاہ رخ خان، ہمایوں سعید اور پریتی زنٹا کے ساتھ کام کا موقع ملا۔ انہوں نے بتایا کہ شاہ رخ خان نے نہایت خوش اخلاقی سے ان سے تعارف کروایا، جبکہ پریتی زنٹا نے بھی گرمجوشی سے استقبال کرتے ہوئے انہیں ریہرسل میں شامل کیا۔
اداکارہ کے مطابق ریہرسل کے دوران انہیں ایک مخصوص لباس پہننے کا کہا گیا جو گلیمرس انداز کا تھا، تاہم انہوں نے پہلی شرط رکھتے ہوئے واضح کیا کہ وہ اپنے کلچر کے مطابق شلوار قمیض اور دوپٹہ ہی پہنیں گی۔ ریما نے کہا کہ جب ہم اپنے ملک کی نمائندگی کر رہے ہوں تو ثقافت پر سمجھوتہ نہیں کیا جا سکتا۔
ریما خان نے مزید بتایا کہ انہوں نے دوسری شرط کے طور پر اسٹیج پر قومی پرچم کی برابری کا مطالبہ کیا۔ ان کا کہنا تھا کہ اگر بھارتی پرچم کو نمایاں کیا جا رہا ہے تو پاکستانی پرچم بھی اسی سائز اور اہمیت کے ساتھ دکھایا جائے، ورنہ وہ اس پرفارمنس کا حصہ نہیں بنیں گی۔
ریما کے مطابق یہ شرائط انہوں نے بطور پاکستانی فنکار اپنی شناخت اور حب الوطنی کے تحت رکھیں، اور اس بات پر زور دیا کہ فنکاروں کے درمیان محبت اپنی جگہ لیکن قومی وقار بھی اتنا ہی اہم ہے۔
دیکھئیے:متنازع ویڈیو پر پیمرا نوٹس اور شدید عوامی تنقید کے بعد فضا علی نے معافی مانگ لی
