پشاور: مردان میں ہونے والے پاکستان تحریک انصاف کے جلسے میں اپوزیشن لیڈر محمود خان اچکزئی کی شرکت غیر یقینی ہو گئی ہے، ذرائع کے مطابق وہ قیادت کی جانب سے اعتماد میں نہ لیے جانے پر ناراض ہیں۔
پی ٹی آئی ذرائع کا کہنا ہے کہ محمود اچکزئی کو جلسے کی تیاریوں اور تاریخ کے تعین سے متعلق اعتماد میں نہیں لیا گیا، جس پر انہوں نے ناراضی کا اظہار کیا ہے۔ بتایا گیا ہے کہ جلسے کی تاریخ وزیراعلیٰ سہیل آفریدی نے طے کی۔
ذرائع کے مطابق بانی پی ٹی آئی عمران خان نے جلسوں اور احتجاجی سرگرمیوں کا اختیار محمود اچکزئی کو دیا تھا، تاہم حالیہ فیصلوں میں ان سے مشاورت نہ ہونے پر اختلافات سامنے آئے ہیں۔
پارٹی ذرائع نے یہ بھی بتایا کہ رہنما عاطف خان نے محمود اچکزئی سے رابطہ کیا اور انہیں جلسے میں شرکت کی دعوت دی، تاہم انہوں نے تاحال شرکت پر آمادگی ظاہر نہیں کی۔
دوسری جانب صوبائی وزیر مینا خان کا کہنا ہے کہ محمود اچکزئی کی مشاورت سے معاملات کو آگے بڑھایا جائے گا اور مردان جلسے سے متعلق احکامات بانی پی ٹی آئی عمران خان کی جانب سے جاری کیے گئے تھے۔
واضح رہے کہ مردان جلسہ پی ٹی آئی کی حالیہ سیاسی سرگرمیوں میں اہم قرار دیا جا رہا ہے، ایسے میں اہم اتحادی رہنما کی ممکنہ عدم شرکت کو پارٹی کے اندرونی اختلافات کے تناظر میں دیکھا جا رہا ہے۔
دیکھئیے:پاکستان کی جانب سے متحدہ عرب امارات کو 2 ارب ڈالر کے قرض کی ادائیگی؛ اسٹیٹ بینک کی تصدیق