لاہور: وفاقی وزیر داخلہ محسن نقوی نے پی ٹی آئی کو اسلام آباد مارچ سے گریز کا مشورہ دیتے ہوئے خبردار کیا ہے کہ وفاقی دارالحکومت پر دھاوا بولنے کی کوشش کرنے والوں کو سخت نتائج کا سامنا کرنا پڑے گا۔
لاہور میں پریس کانفرنس کرتے ہوئے محسن نقوی نے کہا کہ اسلام آباد پر دھاوا بولنے کا کسی کو فائدہ نہیں ہوگا۔ ان کے مطابق اس بار ایسا نہیں ہوگا کہ احتجاج کے باعث ملک 10 سے 20 روز تک بند رہے۔
انہوں نے کہا کہ پی ٹی آئی کی قیادت میں زیادہ تر لوگ لانگ مارچ نہیں کرنا چاہتے۔ ابھی وقت ہے کہ ایسے راستے پر نہ جائیں جہاں سے واپسی ممکن نہ ہو۔
لانگ مارچ پر مؤقف
وزیر داخلہ نے کہا کہ پی ٹی آئی اسلام آباد میں دھرنے کے لیے آتی ہے تو اسلام آباد ہائیکورٹ کے حکم پر عمل کیا جائے گا۔ حکومت اس معاملے میں قانون کے مطابق کارروائی کرے گی۔
محسن نقوی نے پی ٹی آئی کو مشورہ دیا کہ وہ اپنا اور اپنے کارکنوں کا نقصان نہ کرے۔ ان کا کہنا تھا کہ لانگ مارچ کی صورت میں اس بار کوئی کمی نہیں چھوڑی جائے گی۔
انہوں نے یہ بھی کہا کہ پی ٹی آئی کے رہنماؤں کو خود معلوم نہیں کہ ان کا مطالبہ کیا ہے۔
بانی پی ٹی آئی عمران خان کے چیک اپ سے متعلق محسن نقوی نے کہا کہ اگر احتجاج کا مطالبہ چیک اپ ہے تو ان کا چیک اپ گزشتہ رات بھی ہوا ہے۔
انہوں نے کہا کہ عمران خان کے علاج کے لیے قانون کے مطابق ہر ممکن سہولت فراہم کی جائے گی۔
شہداء کے جنازے اور پی ٹی آئی
وزیر داخلہ نے ہنگو میں شہید ہونے والے اہلکاروں کے جنازوں میں وزیراعلیٰ خیبرپختونخوا اور صوبائی وزرا کی عدم شرکت پر بھی تنقید کی۔
محسن نقوی نے کہا کہ سیاسی اختلافات اپنی جگہ، لیکن انہیں اس حد تک نہیں لے جانا چاہیے۔ ان کے مطابق شہداء کسی ایک جماعت یا صوبے کے نہیں بلکہ پورے پاکستان کے ہیں۔
انہوں نے مزید کہا کہ پٹرول کی قیمتوں میں ردوبدل عالمی مارکیٹ سے منسلک ہے۔ نئے صوبوں کے قیام سے متعلق محسن نقوی کا کہنا تھا کہ عوام کی حمایت ہوئی تو نئے صوبے ضرور بنیں گے۔
دیکھیے: اسلام آباد پر چڑھائی کی کوشش برداشت نہیں ہوگی: خواجہ آصف