برازیل کے نامور صحافی اور معروف مصنف پیپے ایسکوبار نے ایک انتہائی سنسنی خیز دعویٰ کیا ہے، جس کے مطابق اسرائیلی خفیہ ایجنسی موساد نے سوئٹزرلینڈ میں موجود پاکستان کے فوجی سربراہ فیلڈ مارشل عاصم منیر کو ایک مبینہ قاتلانہ حملے میں نشانہ بنانے کا منصوبہ تیار کیا تھا۔
دعوے کے مطابق فیلڈ مارشل عاصم منیر سوئٹزرلینڈ میں امریکہ اور ایران کے درمیان جاری اہم ترین امن مذاکرات کے سلسلے میں موجود تھے، اور موساد کا اصل مقصد ان پر حملہ کر کے ان تاریخی مذاکرات کو سبوتاژ کرنا اور خطے کو ایک بار پھر وسیع تر جنگ کی آگ میں دھکیلنا تھا۔
پاکستانی انٹیلی جنس
پیپے ایسکوبار کی رپورٹ کے مطابق پاکستان کی عسکری انٹیلی جنس نے انتہائی چوکسی کا مظاہرہ کرتے ہوئے اپنے آرمی چیف کے خلاف اس مبینہ بین الاقوامی سازش اور قتل کے منصوبے کا وقت سے پہلے سراغ لگا لیا۔
رپورٹ میں مزید کہا گیا ہے کہ اس خطرناک انٹیلی جنس رپورٹ کے باوجود پاکستان نے دباؤ میں آنے کے بجائے فیلڈ مارشل عاصم منیر کے دورے یا طے شدہ ملاقاتوں کے شیڈول میں کوئی تبدیلی نہیں کی، بلکہ سفارتی و خفیہ ذرائع سے اسرائیل کو ایک انتہائی سخت اور براہِ راست پیغام پہنچایا۔
اسرائیل کو پیغام
دعوے کے مطابق پاکستان کی جانب سے تل ابیب کو بھیجے گئے پیغام میں انتہائی سخت لہجہ اختیار کرتے ہوئے واضح کیا گیا کہ اگر آپ نے ہمارے وفد کو ہاتھ بھی لگایا تو ہم آپ کا نام و نشان مٹا دیں گے۔
اس پیغام میں کسی قسم کی لچک یا غلط تشریح کی کوئی گنجائش نہیں چھوڑی گئی تھی، جس کے بعد پاکستانی عسکری قیادت کے اس دوٹوک اور جارحانہ موقف کے سامنے موساد اپنے مبینہ منصوبے سے پیچھے ہٹنے پر مجبور ہو گئی۔