نیشنل پریس کلب کے حالیہ انتخابات میں صدر کی نشست پر سخت مقابلہ دیکھنے میں آیا جبکہ ایگزیکٹو باڈی میں جرنلسٹ پینل کو برتری حاصل رہی۔
صدارتی انتخاب میں ڈیموکریٹس پینل کے امیدوار عبدالرزاق سیال نے 1067 ووٹ حاصل کر کے کامیابی حاصل کی جبکہ ان کے مدمقابل نئیر علی کو 1052 ووٹ ملے۔ دونوں امیدواروں کے درمیان صرف 15 ووٹوں کا فرق رہا۔
مبصرین کے مطابق یہ مقابلہ پریس کلب کے اندر موجود دو بڑے گروپس کے درمیان واضح سیاسی تقسیم کو ظاہر کرتا ہے۔
نتائج کے مطابق گیارہ ایگزیکٹو نشستوں میں سے سات پر جرنلسٹ پینل کامیاب ہوا جس کے باعث ایگزیکٹو باڈی میں اکثریت اسی کے پاس رہی۔
تاہم صدر، سیکرٹری اور چند دیگر اہم نشستوں پر ڈیموکریٹس اتحاد کے امیدوار کامیاب رہے۔
دلچسپ بات یہ ہے کہ اس گروپ سے وابستہ بعض نمایاں امیدوار، جن میں اسد طور اور جویریہ صدیق شامل ہیں، انتخاب میں کامیاب نہ ہو سکے۔
تجزیہ کاروں کا کہنا ہے کہ نتائج سے ظاہر ہوتا ہے کہ ووٹرز نے مختلف نشستوں کیلئے مختلف ترجیحات کا اظہار کیا، جس کے باعث ایگزیکٹو باڈی اور اہم عہدوں کے نتائج میں فرق دیکھنے میں آیا
تجزیہ کاروں کے مطابق عبدالرزاق سیال کی کامیابی کو ڈیموکریٹس پینل کیلئے ایک اہم پیش رفت قرار دیا جا رہا ہے جبکہ نتائج سے ظاہر ہوتا ہے کہ پریس کلب کے اندر مختلف گروپس کے درمیان مقابلہ بدستور موجود ہے۔
دیکھئیے:فیکٹ چیک: فضائی حدود سے متعلق علامہ ناصر عباس کی وائرل ویڈیو جعلی قرار