گوادر: بلوچستان کے ساحلی شہر گوادر میں 7 سے 9 اپریل تک نیشنل یوتھ سمٹ 2026 کا انعقاد کیا جا رہا ہے، جس میں ملک بھر سے نوجوانوں کی بڑی تعداد کی شرکت متوقع ہے۔
محکمہ امورِ نوجوانان بلوچستان کے زیر اہتمام ہونے والا یہ سمٹ جی ڈی اے پبلک ہائر سیکنڈری اسکول میں منعقد ہوگا، جہاں طلبہ، نوجوان رہنما، کاروباری افراد اور مختلف شعبوں سے تعلق رکھنے والے افراد ایک پلیٹ فارم پر جمع ہوں گے۔
حکام کے مطابق “لرن، انوویٹ، لیڈ” کے موضوع کے تحت ہونے والا یہ سمٹ نوجوانوں کیلئے تربیت، رہنمائی اور پالیسی مکالمے کا اہم موقع فراہم کرے گا، جہاں انہیں ماہرین، پالیسی سازوں اور صنعت سے وابستہ افراد سے براہ راست سیکھنے کا موقع ملے گا۔
منتظمین کا کہنا ہے کہ یہ اقدام نوجوانوں کو قومی ترقی کے عمل میں شامل کرنے اور انہیں مستقبل کی قیادت کیلئے تیار کرنے کی حکومتی کوششوں کا حصہ ہے۔
سمٹ کے ساتھ ساتھ گوادر میں ثقافتی، کھیلوں اور سماجی سرگرمیوں کا بھی انعقاد کیا جا رہا ہے، جن میں جشنِ ساحل اسپورٹس فیسٹیول نمایاں ہے، جس سے شہر میں نوجوانوں کی سرگرمیوں کو فروغ مل رہا ہے۔
ماہرین کے مطابق ملک کے مختلف علاقوں سے نوجوانوں کی شرکت بین الصوبائی ہم آہنگی کو فروغ دے گی اور ایک مشترکہ قومی سوچ کو مضبوط کرے گی۔
حکام کا کہنا ہے کہ گوادر، جو کبھی دور دراز علاقہ سمجھا جاتا تھا، اب نوجوانوں کیلئے مواقع، ترقی اور قومی یکجہتی کی علامت بن کر ابھر رہا ہے۔
انہوں نے مزید کہا کہ نوجوانوں کو بااختیار بنانے اور انہیں مثبت سرگرمیوں میں شامل کرنے کیلئے ایسے اقدامات نہایت اہم ہیں، جو ملک کے مستقبل کیلئے مضبوط بنیاد فراہم کرتے ہیں۔
دیکھئیے:مشرق وسطیٰ کشیدگی نے روایتی سمندری راستے بدل دیے، گوادر پورٹ عالمی متبادل ہب بننے لگا