بانیٔ پی ٹی آئی کی بہن نورین خانم کی سرکاری افسر کو دھمکیاں، قانونی بحث چھڑ گئی

سوشل میڈیا پر بانی پی ٹی آئی کی بہن نورین خانم کی جانب سے ایک سرکاری افسر عبدالغفور انجم کو براہِ راست دھمکیاں دینے پر ایک نئی قانونی بحث چھڑ گئی ہے۔ نورین خانم نے اپنے ‘ایکس’ (سابقہ ٹویٹر) اکاؤنٹ پر جیل خانہ جات کے افسر کی تصویر شیئر کرتے ہوئے انہیں بانی پی ٹی آئی کی بینائی سے متعلق مبینہ صورتحال کا ذمہ دار ٹھہراتے ہوئے سنگین نتائج کی دھمکیاں دیں۔

اشتعال انگیز پوسٹ اور پیکا ایکٹ

نورین خانم نے اپنی پوسٹ میں لکھا کہ “سب کچھ یاد رکھا جائے گا، تمہارا انجام نہایت برا ہوگا۔ تمہاری آنکھیں کام نہیں کریں گی اور نہ ہی تمہارے ہاتھ پاؤں حرکت کر سکیں گے۔ تم بانی پی ٹی آئی کی بینائی ختم کرنے کے ذمہ دار ہو۔” اس اشتعال انگیز تحریر کے بعد قانونی ماہرین اور سوشل میڈیا صارفین کی جانب سے اس عمل کو ایک پبلک سرونٹ کو ہراساں کرنے اور اس کی جان کو خطرے میں ڈالنے کے مترادف قرار دیا جا رہا ہے۔ ماہرین کا کہنا ہے کہ یہ اقدام ‘پیکا’ ایکٹ کے تحت ایک قابلِ مواخذہ جرم ہے۔

اداروں پر دباؤ اور کاروائی کا مطالبہ

سیاسی حلقوں اور سماجی تنظیموں کی جانب سے سرکاری ملازمین کے خلاف اس انداز سے زبان درازی اور اشتعال انگیزی پر گہری تشویش کا اظہار کیا جا رہا ہے۔ ناقدین کا مؤقف ہے کہ اس طرزِ عمل سے نہ صرف ریاستی اداروں پر غیر ضروری دباؤ بڑھتا ہے بلکہ معاشرے میں انتشار اور قانون شکنی کا خدشہ بھی پیدا ہوتا ہے۔ اب عوامی اور قانونی حلقوں کی جانب سے ایف آئی اے کے سائبر کرائم ونگ سے واضح مطالبہ کیا جا رہا ہے کہ ڈیجیٹل پلیٹ فارمز کے ذریعے ہراساں کرنے کے اس واقعے کا فوری نوٹس لے کر قانونی کاروائی عمل میں لائی جائے۔

دیکھیے: عمران خان کو ماہرِ امراض چشم اور بیٹوں سے رابطے کی سہولت دی جائے، سپریم کورٹ