کابل میں سکیورٹی اہلکاروں پر ہونے والے حملے میں انٹیلی جنس ادارے کے چار اہلکار جان بحق ہو گئے ہیں۔ رپورٹ کے مطابق مذکورہ واقعہ 09 مارچ 2026 کو رات تقریباً 8 بجے کابل شہر کے تھانہ پندرہ کی حدود میں پیش آیا۔
ذرائع کے مطابق،جی ڈی آئی کے اہلکار اپنی گاڑی میں معمول کی ڈیوٹی پر مامور تھے کہ نامعلوم مسلح افراد نے انہیں نشانہ بنایا۔ حملے کے نتیجے میں گاڑی میں موجود چاروں اہلکار موقع پر ہی دم توڑ گئے۔ واقعے کے فوراً بعد سکیورٹی اہلکاروں نے علاقے کو گھیرے میں لے کر سرچ آپریشن شروع کر دیا، تاہم حملہ آور فرار ہونے میں کامیاب رہے۔
افغانستان میں طالبان انتظامیہ کے خلاف برسرِ پیکار مسلح گروہ ‘نیشنل ریزسٹنس فرنٹ’ (این آر ایف) نے اس حملے کی باقاعدہ ذمہ داری قبول کر لی ہے۔ این آر ایف کی جانب سے جاری کردہ بیان میں دعویٰ کیا گیا ہے کہ ان کے جنگجوؤں نے منصوبہ بندی کے تحت جی ڈی آئی کی گاڑی کو نشانہ بنایا۔ کابل میں حالیہ چند مہینوں کے دوران سکیورٹی فورسز پر ہونے والے حملوں میں تیزی آئی ہے، جو شہر کی امن و امان کی صورتحال پر سوالیہ نشان کھڑے کر رہی ہے۔