نوشکی: سکیورٹی فورسز نے نوشکی میں دہشت گردی کا بڑا منصوبہ ناکام بناتے ہوئے ایک مؤثر کارروائی میں فتنہ الہندوستان کے پانچ اہم کمانڈرز کو ہلاک کر دیا ہے۔ سکیورٹی ذرائع کے مطابق قانون نافذ کرنے والے اداروں کو خفیہ اطلاع ملی تھی کہ دہشت گردوں نے شہر میں حملوں کی منصوبہ بندی کر رکھی ہے اور وہ نوشکی کے نواحی علاقے میں روپوش ہیں۔
سکیورٹی فورسز نے اطلاع ملتے ہی دہشت گردوں کے ٹھکانے پر ٹارگٹڈ آپریشن کیا۔ فورسز کو دیکھتے ہی دہشت گردوں نے جدید خودکار ہتھیاروں سے فائرنگ شروع کر دی، تاہم جوابی کارروائی میں پانچوں اہم کمانڈرز مارے گئے۔ یہ دہشت گرد طویل عرصے سے سکیورٹی فورسز اور پولیس پر حملوں کی متعدد وارداتوں میں مطلوب تھے۔
آپریشن کے بعد سکیورٹی فورسز نے دہشت گردوں کے ٹھکانے کو مسمار کر کے وہاں سے بھاری مقدار میں اسلحہ برآمد کر لیا ہے۔ قبضے میں لیے گئے سامان میں راکٹ لانچرز، بم، دھماکہ خیز مواد اور جدید مواصلاتی آلات شامل ہیں۔ اس کارروائی سے علاقے میں دہشت گردی کا ایک بڑا نیٹ ورک تباہ ہو گیا ہے۔