پاکستان کی سالمیت اور خود مختاری کے تحفظ کے لیے کیے گئے تاریخی آپریشن بنیان مرصوص کی کامیابی کا ایک سال مکمل ہونے پر سینیٹ آف پاکستان اور پنجاب اسمبلی میں تہنیتی قراردادیں منظور کر لی گئی ہیں۔ ان قراردادوں میں معرکۂ حق میں دشمن کی جارحیت ناکام بنانے پر سول و ملٹری قیادت، بالخصوص فیلڈ مارشل سید عاصم منیر اور شہدا کی قربانیوں کو شاندار الفاظ میں سراہا گیا ہے۔
متفقہ قرارداد
ڈپٹی چیئرمین سینیٹ سیدال خان ناصر کی زیرِ صدارت منعقدہ اجلاس میں وفاقی وزیر طارق فضل چوہدری نے معرکۂ حق میں عظیم کامیابی پر ایک اہم قرارداد پیش کی، جسے ایوان نے متفقہ طور پر منظور کر لیا۔ قرارداد کے متن میں کہا گیا کہ یہ ایوان دشمن کے ناپاک عزائم اور بھارتی ’آپریشن سندور‘ کو مؤثر طریقے سے ناکام بنانے پر افواجِ پاکستان کی پیشہ ورانہ مہارت اور حکمتِ عملی کو سلام پیش کرتا ہے۔
ایوانِ بالا نے صدرِ مملکت آصف علی زرداری اور وزیراعظم شہباز شریف کی مدبرانہ قیادت کی تعریف کی، جبکہ فیلڈ مارشل سید عاصم منیر کی جرات مندانہ قیادت اور عسکری حکمتِ عملی کو ملکی دفاع کی مضبوطی کے لیے ناگزیر قرار دیتے ہوئے انہیں خصوصی خراجِ تحسین پیش کیا۔ اس موقع پر تمام سیاسی جماعتوں اور میڈیا کے مثبت کردار کو بھی سراہا گیا۔
پنجاب اسمبلی میں قرارداد
دوسری جانب پنجاب اسمبلی میں مسلم لیگ (ن) کی رکن عظمیٰ کاردار نے آپریشن بنیانِ رصوص کے ایک سال مکمل ہونے پر قرارداد جمع کروائی۔ قرارداد میں مؤقف اختیار کیا گیا کہ ایک سال قبل پاکستان کے محافظوں نے دشمن کی جارحیت کے سامنے سیسہ پلائی ہوئی دیوار بن کر سرحد پار سے آنے والے خطرات کا راستہ روکا۔ متن میں واضح کیا گیا کہ جب بھی ملک کو چیلنجز کا سامنا ہوا، مسلح افواج نے اپنی پیشہ ورانہ صلاحیتوں سے دشمن کے عزائم کو خاک میں ملایا۔
دفاعی عزم کا اعادہ
دونوں ایوانوں میں منظور کی گئی قراردادوں میں اس بات پر زور دیا گیا کہ گزشتہ ایک سال کے دوران سیاسی اور عسکری قیادت نے مل کر قومی سلامتی کو یقینی بنایا ہے۔ پارلیمان نے اس عزم کا اعادہ کیا کہ پوری قوم اپنی افواج کے ساتھ کھڑی ہے اور ملک کی خود مختاری پر کوئی سمجھوتہ نہیں کیا جائے گا۔