پاک افغان سرحد پر افغان طالبان اور فتنہ الخوارج کی جانب سے کی جانے والی بلا اشتعال جارحیت پر پاک فوج نے ‘آپریشن غضب للحق’ کے تحت بھرپور جوابی کاروائی کا آغاز کر دیا ہے۔ سکیورٹی ذرائع کے مطابق سرحد پار سے ہونے والی فائرنگ اور مسلسل اشتعال انگیزی کے جواب میں پاک فوج کی کارروائیاں پوری قوت کے ساتھ جاری ہیں۔
دشمن کا جانی و مالی نقصان
سکیورٹی ذرائع کا کہنا ہے کہ چمن سیکٹر میں پاک فوج نے افغان طالبان کی متعدد چوکیوں اور عسکری گاڑیوں کو انتہائی درستگی کے ساتھ نشانہ بنایا ہے، جس کے نتیجے میں دشمن کا بھاری جانی و مالی نقصان ہوا اور کئی اہم ٹھکانے تباہ کر دیے گئے ہیں۔ پاک فوج کی اس موثر اور بروقت کاروائی نے افغان طالبان اور فتنہ الخوارج کے دہشت گردوں کو پسپائی اختیار کرنے پر مجبور کر دیا ہے۔
دفاعِ وطن کا غیر متزلزل عزم
سکیورٹی فورسز کا کہنا ہے کہ دفاعِ وطن کے لیے ان کا عزم غیر متزلزل ہے اور ملک کی علاقائی سالمیت کو ہر قیمت پر یقینی بنایا جائے گا۔ ‘آپریشن غضب للحق’ کے حوالے سے سیکیورٹی ذرائع نے واضح کیا ہے کہ یہ کارروائی تمام مقررہ اہداف کے مکمل حصول اور سرحدی استحکام کو یقینی بنانے تک بلا تعطل جاری رہے گی۔