اسلام آباد: یومِ پاکستان کے موقع پر پہلی بار دنیا بھر کے 100 سے زائد ممالک کی جانب سے پاکستان کو مبارکباد کے پیغامات موصول ہوئے ہیں، جسے ماہرین پاکستان کی بڑھتی ہوئی عالمی اہمیت اور فعال سفارتکاری کا واضح ثبوت قرار دے رہے ہیں۔
سرکاری ذرائع کے مطابق مختلف خطوں، بشمول مشرق وسطیٰ، ایشیا، یورپ اور افریقہ کے ممالک نے پاکستان کو یومِ پاکستان پر نیک خواہشات کا اظہار کیا۔ مبصرین کا کہنا ہے کہ ماضی میں اس نوعیت کی وسیع عالمی سطح کی پذیرائی دیکھنے میں نہیں آئی۔
تجزیہ کاروں کے مطابق حالیہ برسوں میں پاکستان کی خارجہ پالیسی میں توازن، علاقائی روابط میں بہتری اور عالمی سطح پر فعال کردار نے ملک کی سفارتی حیثیت کو مضبوط کیا ہے۔ ان کے مطابق پاکستان نے نہ صرف خطے میں امن کے لیے کردار ادا کیا بلکہ عالمی فورمز پر بھی مؤثر مؤقف اپنایا۔
ماہرین کا کہنا ہے کہ خلیجی ممالک، چین، ترکی، وسطی ایشیائی ریاستوں اور دیگر شراکت داروں کے ساتھ مضبوط ہوتے تعلقات نے پاکستان کو ایک اہم سفارتی کھلاڑی کے طور پر ابھارا ہے۔ اسی تناظر میں یومِ پاکستان پر غیر معمولی عالمی ردعمل کو دیکھا جا رہا ہے۔
سفارتی حلقوں کے مطابق پاکستان کی اقتصادی و تزویراتی اہمیت، علاقائی رابطہ کاری کے منصوبے اور توانائی و سکیورٹی کے شعبوں میں کردار بھی عالمی توجہ کا باعث بن رہے ہیں۔
ماہرین کا مزید کہنا ہے کہ یہ پیشرفت اس بات کا اشارہ ہے کہ پاکستان عالمی برادری میں ایک ذمہ دار اور اہم ریاست کے طور پر اپنی جگہ مستحکم کر رہا ہے، جبکہ آئندہ دنوں میں سفارتی سطح پر مزید پیش رفت کی توقع کی جا رہی ہے۔
دیکھئیے:ملک بھر میں یومِ پاکستان انتہائی جوش و جذبے سے منایا جا رہا ہے