تہران: وفاقی وزیر داخلہ محسن نقوی نے ایران کے صدر مسعود پزشکیان اور ایرانی وزیر داخلہ اسکندر مومنی سے ملاقاتیں کیں، جن میں پاک ایران دو طرفہ تعلقات، تعاون اور خطے کی صورتحال پر تبادلہ خیال کیا گیا۔
ایرانی صدر مسعود پزشکیان نے پاکستان اور ایران کے درمیان مسلسل رابطے بڑھانے پر زور دیتے ہوئے کہا کہ دونوں ممالک باہمی تعاون کو تمام شعبوں میں مزید مضبوط بنا سکتے ہیں۔
انہوں نے کہا کہ پاکستان اور ایران اپنی مقامی اور علاقائی صلاحیتوں سے اپنی ضروریات پوری کر سکتے ہیں۔ ان کے مطابق امریکی دباؤ نے مسلم ممالک کے درمیان مزید قربت اور روابط کو فروغ دیا ہے۔
محسن نقوی نے کہا کہ پاکستان تجارت، معیشت، سیاحت اور سیاست سمیت تمام شعبوں میں ایران کے ساتھ تعاون بڑھانے کے لیے پرعزم ہے۔
وفاقی وزیر داخلہ نے کہا کہ پاکستان ثقافت اور سائنس کے شعبوں میں بھی ایران کے ساتھ تعاون کو مزید وسعت دے گا۔
ایرانی وزیر داخلہ سے ملاقات
اس سے قبل محسن نقوی نے ایرانی ہم منصب اسکندر مومنی سے ملاقات کی، جس میں پاک ایران دو طرفہ تعلقات اور خطے کی تازہ صورتحال پر گفتگو ہوئی۔
ملاقات میں دونوں ممالک کی وزارت داخلہ کے درمیان مختلف شعبوں میں جاری تعاون کا بھی جائزہ لیا گیا۔
اسکندر مومنی نے علاقائی امن و استحکام کے لیے وزیراعظم شہباز شریف اور فیلڈ مارشل سید عاصم منیر کی کاوشوں کو سراہا۔ انہوں نے خطے میں قیام امن کے لیے پاکستان کی کوششوں پر شکریہ ادا کیا اور کہا کہ پاکستان کا حالیہ دورہ مفید رہا۔
محسن نقوی نے کہا کہ آنے والے وقت میں پاکستان اور ایران کے دو طرفہ تعلقات مزید مستحکم ہوں گے۔
وفاقی وزیر داخلہ سرکاری دورے پر تہران پہنچے تھے، جہاں ایئرپورٹ پر ایرانی وزیر داخلہ اسکندر مومنی نے ان کا استقبال کیا۔
