پاک بحریہ نے اپنی جنگی صلاحیتوں اور آپریشنل تیاریوں کے ایک طاقتور مظاہرے میں مقامی طور پر تیار کردہ ‘تیمور’ ایئر لانچ کروز میزائل کا کامیاب تجربہ کیا ہے۔ یہ میزائل سسٹم پاکستان کے اینٹی شپ ویپن پروگرام میں ایک اہم پیش رفت ہے جو طویل فاصلے تک دشمن کے بحری اہداف کو نشانہ بنانے کی صلاحیت رکھتا ہے۔
آئی ایس پی آر کے مطابق ‘تیمور’ میزائل نے اپنے ہدف کو غیر معمولی درستگی کے ساتھ نشانہ بنا کر اپنی جنگی افادیت کو ثابت کر دیا ہے۔ اس کامیاب تجربے نے پاک بحریہ کی سمندر میں دشمن کے خطرات کا سراغ لگانے، انہیں ہدف بنانے اور فیصلہ کن انداز میں تباہ کرنے کی صلاحیت کی توثیق کی ہے۔
ترجمان آئی ایس پی آر کا مزید کہنا ہے کہ یہ تجربہ قومی دفاعی صلاحیتوں میں اضافے کی جانب ایک کلیدی سنگ میل ہے، جس سے روایتی دفاعی میدان میں پاکستان کی مسلح افواج کی کثیر جہتی اور مربوط جوابی کاروائی کی قوت مزید مستحکم ہوئی ہے۔ پاک بحریہ ملک کے بحری مفادات اور علاقائی حدود کی حفاظت کے لیے ہمہ وقت تیار اور پرعزم ہے۔
اس اہم کامیابی پر صدر مملکت، وزیراعظم پاکستان، چیف آف ڈیفنس فورسز اور سروسز چیفس نے متعلقہ سائنسدانوں اور انجینئرز کو مبارکباد پیش کرتے ہوئے ان کی کاوشوں کو سراہا ہے۔
اعلیٰ قیادت نے اس عزم کا اعادہ کیا ہے کہ قومی سلامتی اور سمندری سرحدوں کے تحفظ پر کوئی سمجھوتہ نہیں کیا جائے گا۔ پاک بحریہ کے حکام کا کہنا ہے کہ ہماری فورس ہر قسم کے چیلنجز اور بیرونی خطرات سے نمٹنے کے لیے ہمہ وقت تیار ہے۔
دیکھیے: شہباز شریف کا یورپی کونسل کے صدر سے ٹیلیفونک رابطہ: مشرقِ وسطیٰ کی صورتحال پر تبادلہ خیال
