وزارت اطلاعات و نشریات نے حوثیوں کے خلاف پاک فضائیہ کے طیاروں کے استعمال سے متعلق نیویارک ٹائمز کی خبر کو جھوٹا اور من گھڑت قرار دے دیا۔
وزارت اطلاعات و نشریات کے فیکٹ چیک کے مطابق نیویارک ٹائمز کی مذکورہ خبر میں پاک فضائیہ کے طیاروں کو حوثیوں کے خلاف استعمال کیے جانے کا دعویٰ کیا گیا، جو مکمل طور پر جھوٹا اور من گھڑت ہے۔
وزارت نے عالمی میڈیا کو مکہ مشترکہ دفاعی معاہدے کے تحت پاکستانی افواج کے استعمال سے متعلق قیاس آرائیوں سے گریز کرنے کی ہدایت کی ہے۔
بیان میں کہا گیا ہے کہ پاکستانی افواج کی کسی بھی قسم کی تعیناتی اگر ضروری ہوئی تو اس کی تفصیلات متعلقہ حکام خود فراہم کریں گے۔
وزارت اطلاعات کے مطابق عالمی میڈیا کو دفاعی معاملات پر غیر مصدقہ اطلاعات کی بنیاد پر قیاس آرائیوں سے گریز کرنا چاہیے۔ حکومت کی جانب سے کسی بھی فوجی تعیناتی سے متعلق معلومات باضابطہ طور پر فراہم کی جائیں گی۔
وزارت اطلاعات و نشریات نے اپنے فیکٹ چیک میں کہا کہ حقائق کی تصدیق کے بغیر ایسی رپورٹس نشر کرنا درست نہیں۔