اسلام آباد: وزارت خزانہ کے حکام کے مطابق پاکستان ایشیائی ترقیاتی بینک (اے ڈی بی) سے 50 کروڑ ڈالر کے مساوی نیا قرض حاصل کرے گا۔
حکام کا کہنا ہے کہ اس قرض کا مقصد سرکاری پنشن نظام میں اصلاحات لانا اور بڑھتے ہوئے پنشن اخراجات کو قابو میں لانا ہے۔ وفاقی حکومت کا سالانہ پنشن بل اس وقت 1055 ارب روپے تک پہنچ چکا ہے۔
وزارت خزانہ کے مطابق منصوبے کو “ٹرانسفارمنگ پبلک سیکٹر پنشن پروگرام” کا نام دیا گیا ہے جس کے تحت سرکاری اداروں کیلئے تربیتی اور آگاہی پروگرام بھی شروع کیے جائیں گے۔
حکام کے مطابق مجوزہ اصلاحات کے تحت پنشن نظام میں گورننس اور نگرانی کے طریقہ کار کو مزید مضبوط بنایا جائے گا۔
وزارت خزانہ کا کہنا ہے کہ نئی اصلاحات کے ذریعے مستقبل میں پنشن کے مالی بوجھ میں کمی لانے اور نظام کو زیادہ شفاف اور پائیدار بنانے میں مدد ملے گی۔