راولپنڈی: پاک فوج کے شعبہ تعلقات عامہ کے مطابق آرمی راکٹ فورس کمانڈ نے منگل کے روز مقامی طور پر تیار کردہ “فتح ٹو” میزائل سسٹم کا کامیاب تربیتی تجربہ مکمل کر لیا ہے۔ یہ میزائل سسٹم جدید ترین ایویونکس اور نیویگیشن کے آلات سے لیس ہے، جو اسے ہدف کو انتہائی درستگی کے ساتھ نشانہ بنانے کی صلاحیت فراہم کرتا ہے۔
آئی ایس پی آر کے جاری کردہ بیان میں بتایا گیا کہ اس تربیتی تجربے کا بنیادی مقصد دستوں کی تربیت، مختلف تکنیکی پیرامیٹرز کی توثیق اور میزائل کے ذیلی نظاموں کی کارکردگی کا جائزہ لینا تھا، تاکہ میزائل کی درستگی اور دشمن کے دفاعی نظام سے بچنے کی صلاحیت کو مزید بہتر بنایا جا سکے۔ اس اہم تجربے کا مشاہدہ اسٹریٹجک پلانز ڈویژن، آرمی راکٹ فورس کمانڈ اور پاک فوج کے اعلیٰ افسران سمیت اسٹریٹجک تنظیموں کے سائنسدانوں اور انجینئرز نے کیا۔
صدر مملکت آصف علی زرداری، وزیراعظم شہباز شریف، چیف آف ڈیفنس فورسز و چیف آف آرمی اسٹاف فیلڈ مارشل عاصم منیر اور دیگر سروسز چیفس نے اس کامیابی پر ٹیم کی تکنیکی مہارت اور لگن کو سراہا ہے۔ یاد رہے کہ پاکستان اپنی دفاعی صلاحیتوں کو بہتر بنانے کے لیے مسلسل کوشاں ہے؛ ستمبر 2025 میں 750 کلومیٹر تک مار کرنے والے کروز میزائل فتح فور اور گزشتہ ماہ پاک بحریہ کی جانب سے فضا سے مار کرنے والے کروز میزائل ‘تیمور’ کے کامیاب تجربات بھی اسی کڑی کا حصہ ہیں۔ ماہرین کے مطابق فتح ٹو کا کامیاب تجربہ خطے میں تزویراتی توازن برقرار رکھنے اور دفاعِ وطن کو ناقابلِ تسخیر بنانے میں اہم کردار ادا کرے گا۔
دیکھئیے:آپریشن غضب للحق کا نیا مرحلہ: بی ایل اے کے خلاف کاروائیاں تیز، نئے محاذ کے دعوے مسترد