وزارتِ اطلاعات و نشریات کے ‘فیکٹ چیکر’ ونگ نے سوشل میڈیا پر پاکستانی بندرگاہوں کی عارضی بندش کے حوالے سے زیرِ گردش نوٹیفکیشن کو طور پر جعلی قرار دے دیا ہے۔ سرکاری اعلامیے کے مطابق بندرگاہوں کے داخلی راستے 10 مارچ تک بند کرنے کے حوالے سے پھیلائی جانے والی خبروں میں کوئی صداقت نہیں ہے۔
وفاقی فیکٹ چیکر کی جانب سے جاری کردہ بیان میں واضح کیا گیا ہے کہ انٹرنیٹ پر ایک جعلی نوٹیفکیشن وائرل ہے جس میں دعویٰ کیا گیا تھا کہ حکومت نے ملک کی بندرگاہوں کو عارضی طور پر بند کرنے کا حکم دیا ہے۔ ترجمان نے تصدیق کی ہے کہ کابینہ ڈویژن یا وزارتِ بحری امور کی جانب سے ایسا کوئی حکم نامہ جاری نہیں کیا گیا اور نہ ہی ایسی کوئی تجویز زیرِ غور ہے۔
حکام نے عوام اور کاروباری طبقے سے اپیل کی ہے کہ وہ ایسی غیر تصدیق شدہ اور گمراہ کن خبروں پر کان نہ دھریں، کیونکہ اس کا مقصد تجارتی سرگرمیوں میں خلل ڈالنا اور بے یقینی کی صورتحال پیدا کرنا ہے۔ وزارتِ اطلاعات نے واضح کیا ہے کہ بندرگاہوں پر تمام تر آپریشنز معمول کے مطابق جاری ہیں اور کسی بھی قسم کی بندش کی خبریں محض افواہ ہیں۔
دیکھیے: پاکستان کو نشانہ بنانے کا نیا حربہ: لیلا کننگھم کے دعوے اور برطانوی اعداد و شمار کا تضاد