پاکستان نے بین الاقوامی میڈیا ادارے ‘الجزیرہ’ کی جانب سے وزیراعظم آفس کے مبینہ ذرائع کے حوالے سے نشر کی جانے والی خبر کو قطعی طور پر مسترد کرتے ہوئے اسے جھوٹا اور بے بنیاد قرار دے دیا ہے۔ سوشل میڈیا پر زیرِ گردش اس رپورٹ میں دعویٰ کیا گیا تھا کہ اسلام آباد نے امریکی صدر ڈونلڈ ٹرمپ کو کسی اہم فوجی فیصلے سے متعلق کوئی خاص درخواست ارسال کی ہے، جسے پاکستانی حکام نے محض قیاس آرائی اور ‘فیک نیوز’ قرار دیا ہے۔
حکومتی ذرائع کا اس حوالے سے کہنا ہے کہ پاکستان غیر مجاز معلومات کی فراہمی کے بجائے ہمیشہ اپنے سرکاری ترجمانوں کے ذریعے باضابطہ موقف پیش کرنے کی پالیسی پر کاربند ہے۔
حکام نے دوٹوک الفاظ میں واضح کیا ہے کہ کسی بھی غیر ملکی ادارے کو ایسی کوئی ‘فیڈ’ یا معلومات فراہم نہیں کی گئی ہیں جس کا تذکرہ متعلقہ رپورٹ میں کیا گیا ہے۔
دوسری جانب ماہرینِ امورِ خارجہ کا کہنا ہے کہ الجزیرہ کی جانب سے حالیہ عرصے میں پاکستانی حکام کے بارے میں بار بار اس نوعیت کے غلط دعوے سامنے آنا ایک منظم بیانیہ سازی کی کوشش معلوم ہوتی ہے۔ ماہرین کے مطابق ایسی خبروں کا حقیقت سے کوئی تعلق نہیں ہے اور ان کا مقصد محض سنسنی خیزی پیدا کرنا اور ریاست کے حساس معاملات کے بارے میں ابہام پھیلانا ہے۔