اقوام متحدہ میں پاکستان کے مستقل نمائندے عاصم افتخار احمد نے فلسطینی عوام کے ساتھ پاکستان کی غیر متزلزل یکجہتی کا اعادہ کرتے ہوئے واضح کیا ہے کہ فلسطین کی حمایت پاکستان کی اپنی تحریکِ آزادی کی جدوجہد کا ایک لازمی حصہ ہے۔ انہوں نے زور دے کر کہا کہ پاکستان فلسطینی عوام کے حقِ خود ارادیت، آزادی اور وقار کے لیے ان کی منصفانہ جدوجہد کی مکمل اور اصولی حمایت جاری رکھے گا۔
فلسطینیوں کی جبری بے دخلی اور المیے یعنی یومِ نکبہ کی افسوسناک برسی کے موقع پر اپنے ایک خصوصی پیغام میں سفیر عاصم افتخار احمد کا کہنا تھا کہ اس تاریخی ناانصافی کو محض یاد کرنا کافی نہیں ہے، بلکہ اب عملی اقدامات کی ضرورت ہے۔
انہوں نے عالمی برادری کو متوجہ کرتے ہوئے کہا کہ نکبہ کے اس طویل المیے کو اب کسی اور نسل تک جاری رہنے کی اجازت نہیں دی جا سکتی۔
پاکستانی مندوب نے مطالبہ کیا کہ فلسطین میں جاری مظالم اور غاصبانہ قبضے کا اب مستقل خاتمہ ہونا چاہیے۔ انہوں نے مزید کہا کہ مشرقِ وسطیٰ میں پائیدار امن کا قیام صرف اور صرف انصاف، قابض قوتوں کے احتساب اور فلسطینی زمین پر غیر قانونی قبضے کے مکمل خاتمے کے ذریعے ہی ممکن ہے۔
