بنگلہ دیش میں متعین پاکستان کے ہائی کمشنر عمران حیدر نے آج ڈھاکہ میں بنگلہ دیشی وزیر تعلیم ڈاکٹر اے این ایم احسان الحق ملن سےملاقات کی۔ ملاقات کے آغاز میں ہائی کمشنر نے ڈاکٹر احسان الحق ملن کو وزارت کا قلمدان سنبھالنے پر حکومتِ پاکستان کی جانب سے مبارکباد پیش کی اور ان کے لیے نیک خواہشات کا اظہار کیا۔
ملاقات کے دوران دونوں ممالک کے درمیان دیرینہ برادرانہ تعلقات اور مختلف شعبوں بالخصوص تعلیم، سائنس اور جدید ٹیکنالوجی میں تعاون کی موجودہ صورتحال کا تفصیلی جائزہ لیا گیا۔ ہائی کمشنر عمران حیدر اور وزیر تعلیم ڈاکٹر احسان الحق ملن نے اس بات پر اتفاق کیا کہ تعلیمی روابط کی مضبوطی دونوں ممالک کے نوجوانوں کے روشن مستقبل کے لیے ناگزیر ہے۔
اس تناظر میں دوطرفہ اقدامات کے تحت پاکستانی جامعات میں بنگلہ دیشی طلبہ کے لیے اسکالرشپس کے کوٹے میں اضافے اور تعلیمی وظائف کی فراہمی کو مزید سہل بنانے پر مشاورت کی گئی۔
گفتگو کے دوران جدید سائنسی علوم اور ایڈوانس ٹیکنالوجی کے تبادلے پر خصوصی توجہ دی گئی۔ دونوں رہنماؤں نے اس عزم کا اعادہ کیا کہ بدلتے ہوئے عالمی تعلیمی منظرنامے کے مطابق مشترکہ تحقیقی منصوبوں، فیکلٹی ایکسچینج پروگرامز اور تکنیکی مہارتوں کی منتقلی کے لیے ایک جامع فریم ورک تیار کیا جائے گا۔
وزیر تعلیم نے پاکستان کی جانب سے تعلیمی شعبے میں تعاون کی پیشکش کو سراہتے ہوئے کہا کہ بنگلہ دیش سائنسی و تکنیکی میدان میں تجربات کے تبادلے کو اہمیت دیتا ہے۔ ملاقات کے اختتام پر دونوں جانب سے تعلیمی و سائنسی تعاون کو مزید فعال بنانے اور مستقبل میں ان روابط کو پائیدار بنیادوں پر استوار کرنے کی ضرورت پر زور دیا گیا۔