وزیراعظم شہباز شریف نے مشرق وسطیٰ میں حالیہ کشیدگی کے باعث عالمی منڈی میں تیل کی قیمتوں میں اضافے کے بعد عوام کو ریلیف دینے کے لیے خصوصی پٹرول سبسڈی اسکیم کا اعلان کردیا۔
وزیراعظم آفس کے مطابق اسکیم کے تحت موٹرسائیکل، رکشہ، چنگچی اور 800 سی سی تک کی گاڑیاں استعمال کرنے والوں کو پٹرول پر فی لیٹر 100 روپے کا ریلیف دیا جائے گا۔
وزیراعظم شہباز شریف نے کہا کہ عالمی منڈی میں تیل کی قیمتوں میں اضافے سے عوام پر پڑنے والے اضافی بوجھ کا حکومت کو احساس ہے، مشکل کی اس گھڑی میں عوام کو تنہا نہیں چھوڑا جائے گا۔
خصوصی ریلیف اسکیم کے تحت موٹرسائیکل، رکشہ اور چنگچی سمیت دو اور تین پہیوں والی سواریوں کے لیے ماہانہ 20 لیٹر پٹرول پر فی لیٹر 100 روپے کا ریلیف فراہم کیا جائے گا۔
اسی طرح 800 سی سی تک کی چھوٹی گاڑیوں کے مالکان کو ماہانہ 30 لیٹر پٹرول پر فی لیٹر 100 روپے کی سبسڈی دی جائے گی۔
اسلام آباد میں 15 ستمبر سے اطلاق
وزیراعظم آفس کے مطابق اسکیم کا اطلاق اسلام آباد میں 15 اور 16 ستمبر کی درمیانی شب سے ہوگا، جبکہ ملک بھر، بشمول آزاد کشمیر اور گلگت بلتستان، میں 16 اور 17 ستمبر کی درمیانی شب سے اس کا نفاذ کیا جائے گا۔
خصوصی ریلیف اسکیم کے لیے رجسٹریشن کا عمل بھی شروع کردیا گیا ہے۔ حکومت کی جانب سے آگاہی مہم کے ذریعے عوام کو رجسٹریشن اور اسکیم سے استفادے کے طریقہ کار سے آگاہ کیا جائے گا۔
وزیراعظم نے اسکیم کے لیے موٹرسائیکل، رکشہ اور چھوٹی گاڑیوں سے متعلق مطلوبہ معلومات کی فراہمی میں تعاون پر صوبائی حکومتوں کا شکریہ بھی ادا کیا۔