تھائی لینڈ کے مشہور سیاحتی جزیرے فوکٹ کے علاقے پٹونگ میں خوفناک آتشزدگی کے نتیجے میں 11 افراد ہلاک ہوگئے، جبکہ متعدد افراد عمارتوں میں پھنس گئے۔ آگ نے دیکھتے ہی دیکھتے قریبی عمارتوں کو بھی اپنی لپیٹ میں لے لیا۔
حکام کے مطابق یہ حادثہ علی الصبح تقریباً 3 بج کر 17 منٹ پر پیش آیا، جہاں ایک چار منزلہ تجارتی عمارت میں اچانک آگ بھڑک اٹھی۔ عمارت کی نچلی منزل پر موٹر سائیکلوں کی خرید و فروخت اور کرائے پر دینے کا کاروبار تھا، جبکہ اوپری منزلوں پر رہائشی کمرے بنے ہوئے تھے۔
عمارت میں 100 سے زائد موٹر سائیکلیں موجود تھیں۔ پٹرول، ٹائر، ربڑ اور پلاسٹک کے پرزوں کی وجہ سے آگ نے تیزی سے شدت اختیار کرلی اور پوری عمارت دھوئیں سے بھر گئی۔
آگ پھیلنے کے باعث کئی افراد کو باہر نکلنے کا موقع نہ مل سکا۔ واقعے کے بعد امدادی ٹیموں نے کارروائی شروع کردی، جبکہ حکام کی جانب سے آتشزدگی کی وجوہات اور مزید نقصانات کا جائزہ لیا جا رہا ہے۔





