وزیرِ اعظم محمد شہباز شریف ایک اعلیٰ سطحی وفد کے ہمراہ قطر کے سرکاری دورے پر دوحہ پہنچ گئے ہیں۔ دوحہ کے بین الاقوامی ہوائی اڈے پر قطر کے وزیرِ مملکت برائے خارجہ امور سلطان بن سعد المریخی نے وزیرِ اعظم کا پرتپاک استقبال کیا۔ اس موقع پر قطری مسلح افواج کے چاق و چوبند دستے نے وزیرِ اعظم کو گارڈ آف آنر پیش کیا، جبکہ دوحہ کی شاہراہوں کو پاکستان اور قطر کے پرچموں سے سجایا گیا ہے۔
وزیرِ اعظم اپنے اس دورے کے دوران قطر کے امیر شیخ تمیم بن حمد آل ثانی سے ون آن ون ملاقات کریں گے۔ اس ملاقات میں دو طرفہ اقتصادی تعاون، سرمایہ کاری اور تجارت کے فروغ سمیت علاقائی و عالمی امن کے لیے پاکستان کی جاری کوششوں پر تفصیلی تبادلہ خیال کیا جائے گا۔ دورے کا مقصد دونوں برادر ممالک کے مابین اسٹریٹجک شراکت داری کو مزید مستحکم بنانا ہے۔
وزیرِ اعظم کے ہمراہ وفد میں نائب وزیرِ اعظم و وزیرِ خارجہ سینیٹر اسحاق ڈار، وزیرِ اطلاعات و نشریات عطا اللہ تارڑ، معاونِ خصوصی طارق فاطمی اور وزیرِ اعظم کے ترجمان برائے عالمی میڈیا مشاہد زیدی بھی شامل ہیں۔ یہ دورہ پاکستان اور قطر کے مابین موجودہ برادرانہ تعلقات کو نئی بلندیوں تک لے جانے کے لیے انتہائی اہمیت کا حامل قرار دیا جا رہا ہے۔