اسلام آباد: وزیراعظم محمد شہباز شریف نے وزیراعلیٰ خیبر پختونخوا محمد سہیل آفریدی سے ٹیلیفونک رابطہ کر کے بنوں میں پولیس چوکی پر ہونے والے حالیہ دہشت گرد حملے کی شدید الفاظ میں مذمت کی ہے۔ وزیراعظم نے حملے میں ہونے والے جانی نقصان پر گہرے رنج و غم کا اظہار کرتے ہوئے شہید اہلکاروں کے خاندانوں سے دلی ہمدردی کا اظہار کیا اور زخمیوں کی جلد صحت یابی کے لیے دعا کی۔
گفتگو کے دوران وزیراعظم شہباز شریف نے اس عزم کا اعادہ کیا کہ وفاقی حکومت دہشت گردی کے مکمل خاتمے کے لیے صوبائی حکومتوں کے ساتھ مل کر کام کرتی رہے گی۔ انہوں نے واضح کیا کہ اس ناسور کے خلاف جنگ میں خیبر پختونخوا حکومت کو ہر ممکنہ عسکری اور انتظامی معاونت فراہم کی جائے گی تاکہ امن و امان کی صورتحال کو برقرار رکھا جا سکے۔ وزیراعظم کا کہنا تھا کہ دہشت گردی کے خلاف تمام ریاستی ادارے متحد ہیں اور اس لعنت کو جڑ سے اکھاڑ پھینکنے تک چین سے نہیں بیٹھیں گے۔
وزیراعظم اور وزیراعلیٰ نے دہشت گردی کے خلاف فرنٹ لائن پر نبرد آزما پاک افواج، سیکیورٹی فورسز اور پولیس کے بہادر جوانوں کے کردار کو زبردست خراجِ تحسین بھی پیش کیا۔ وزیراعظم نے تاکید کی کہ شہدا کی قربانیاں ضائع نہیں جائیں گی اور ریاست اپنے محافظوں کے خون کے ایک ایک قطرے کا حساب لے گی۔