بیرونِ ملک سیاسی جماعت کا نام استعمال کر کے اسائلم، مالی فائدے اور ذاتی مفادات حاصل کرنے والے عناصر کا اصل چہرہ اور ان کے مبینہ دھندے بے نقاب ہو گئے ہیں۔ دستیاب گواہیوں اور ٹھوس دستاویزی ریکارڈ کے مطابق پاکستان تحریک انصاف (پی ٹی آئی) کا نام استعمال کرنے والے معاذ خان نامی شخص کے خلاف مالی بددیانتی، بدسلوکی اور رہائش کے معاملے میں ڈیفالٹ کے الزامات اب محض الزامات تک محدود نہیں رہے بلکہ مکمل طور پر ثابت ہو چکے ہیں۔
موصولہ تفصیلات کے مطابق معاذ خان جس کرائے کے گھر میں رہائش پذیر تھا، وہاں طویل عرصے تک کرایہ ادا نہ کرنے اور کسی بھی قسم کے قانونی کور کے بغیر رہنے کی وجہ سے اسے مالکان کی جانب سے مکان سے نکال دیا گیا ہے۔ کرائے کے گھر سے بے دخلی، مالی ڈیفالٹ اور قانونی دستاویزات کی عدم موجودگی نے معاذ خان کے تمام تر دعووں پر سنجیدہ سوالات کھڑے کر دیے ہیں۔
بیرون ملک مقیم پاکستانی کمیونٹی کا کہنا ہے کہ جو شخص اپنے میزبانوں، ساتھیوں اور کمیونٹی کے ساتھ فراڈ اور بددیانتی کا مرتکب ہو، وہ کوئی سیاسی کارکن نہیں بلکہ محض ایک مفاد پرست کردار ہے، جو اپنے ذاتی فائدے کے لیے ملک اور قوم کا نام داغدار کر رہا ہے۔
اس صورتحال پر بیرونِ ملک مقیم پاکستانی کمیونٹی نے شدید ردعمل کا اظہار کرتے ہوئے متعلقہ حکام سے پرزور مطالبہ کیا ہے کہ معاذ خان کی اسائلم درخواست، موجودہ رہائشی حیثیت اور تمام تر مشکوک سرگرمیوں کا فوری اور باریک بینی سے جائزہ لیا جائے۔
کمیونٹی رہنماؤں کا مؤقف ہے کہ سیاسی مظلومیت کا ڈرامہ رچا کر اور کمیونٹی کا استحصال کر کے ذاتی مفادات حاصل کرنے والے ایسے کرداروں کو قانون اور ریکارڈ کے سامنے جوابدہ بنانا ناگزیر ہو چکا ہے، تاکہ اسائلم کے نام پر سیاسی لبادہ اوڑھ کر ملک کو بدنام کرنے والے عناصر کا مستقل سدِباب کیا جا سکے۔