مریم نواز عیدی اسکیم کا دعویٰ جھوٹا ہے، حکومت پنجاب نے واضح تردید کر دی

لاہور: سوشل میڈیا پر گردش کرنے والی خبروں میں دعویٰ کیا جا رہا تھا کہ حکومت پنجاب نے ”مریم نواز شریف عیدی اسکیم“ کے تحت کم آمدنی والے افراد کو 5 ہزار روپے دینے کا اعلان کیا ہے، تاہم حکام نے اس دعوے کو مکمل طور پر غلط قرار دے دیا ہے۔

رپورٹس کے مطابق 11 مارچ کو ایک انسٹاگرام پوسٹ میں کہا گیا کہ عیدالفطر کے موقع پر شہریوں کو مالی معاونت فراہم کی جائے گی اور 12 سال یا اس سے زائد عمر کے افراد اس اسکیم کیلئے رجسٹریشن بھی کروا سکتے ہیں، تاہم یہ دعویٰ حقائق کے منافی نکلا۔

پنجاب حکومت کے ترجمان اور وزیراعلیٰ کے مشیر برائے سیاسی امور ذیشان ملک نے اس خبر کی تردید کرتے ہوئے واضح کیا کہ ایسی کسی اسکیم کا کوئی وجود نہیں۔

صوبائی وزیر اطلاعات عظمیٰ بخاری نے بھی اس دعوے کو مسترد کرتے ہوئے کہا کہ حکومت پنجاب کی جانب سے اس حوالے سے نہ کوئی اعلان کیا گیا اور نہ ہی کوئی ہینڈ آؤٹ جاری کیا گیا ہے۔

حکام کے مطابق سوشل میڈیا پر پھیلائی جانے والی یہ معلومات بے بنیاد اور گمراہ کن ہیں، جن کا مقصد عوام کو غلط معلومات فراہم کرنا ہے۔

تجزیہ کاروں کے مطابق عید جیسے مواقع پر اس نوعیت کی فیک اسکیموں کا پھیلاؤ بڑھ جاتا ہے، اس لیے شہریوں کو چاہیے کہ وہ صرف مستند ذرائع پر ہی اعتماد کریں۔

دیکھئیے:ایران وفد کی پاکستان آمد کا دعویٰ جھوٹا، سوشل میڈیا پروپیگنڈا بے نقاب