بلوچستان کے ضلع کلات کے علاقے منگوچر میں سیکورٹی فورسز نے بلوچ لبریشن آرمی کے دہشت گردوں کے خلاف ایک مؤثر آپریشن کیا۔ آپریشن کا ہدف بی ایل اے کے گروہ “فتنہ الحندوستان” سے تعلق رکھنے والے خطرناک دہشت گرد تھے۔
آپریشن کے دوران سیکورٹی فورسز نے پیشہ ورانہ مہارت کا مظاہرہ کرتے ہوئے 4 دہشت گردوں کو ہلاک کر دیا۔ دہشت گردوں کے قبضے میں موجود کمپاؤنڈ، جو ایک محفوظ پناہ گاہ کے طور پر استعمال ہو رہا تھا، کو مکمل طور پر تباہ کر دیا گیا تاکہ مستقبل میں کسی بھی دہشت گردانہ سرگرمی کے لیے اس کا دوبارہ استعمال ممکن نہ ہو۔
سیکورٹی ذرائع کے مطابق یہ کارروائی دہشت گرد تنظیموں کی بلوچستان میں موجودگی اور ان کی دہشت گردانہ کارروائیوں کو ناکام بنانے کے لیے کی گئی ہے۔ مقامی انتظامیہ اور سیکورٹی فورسز نے عوام سے اپیل کی ہے کہ وہ مشکوک سرگرمیوں کی فوری اطلاع دیں تاکہ علاقے میں امن و امان کو برقرار رکھا جا سکے۔
یہ کامیاب آپریشن بلوچستان میں جاری انسداد دہشت گردی مہم کے تحت اہم سنگ میل کے طور پر دیکھا جا رہا ہے، اور صوبائی حکومت نے سیکورٹی فورسز کی بہادری اور پیشہ ورانہ صلاحیتوں کو سراہا ہے۔