سکیورٹی فورسز نے قلات کے قریب این 25 پر بروقت کارروائی کرتے ہوئے 5 دہشتگردوں کو ہلاک کردیا۔
آئی ایس پی آر کے مطابق دہشتگردوں کی جانب سے عوامی آمدورفت میں خلل ڈالنے کی کوشش ناکام بنا دی گئی۔
سکیورٹی فورسز نے کارروائی کے دوران دہشتگردوں کے ٹھکانے کو نشانہ بنایا۔ کارروائی کے بعد ٹھکانے سے 23 مغوی افراد کو بحفاظت بازیاب کرا لیا گیا۔
اسلحہ برآمد
آئی ایس پی آر کے مطابق دہشتگردوں کے قبضے سے 6 ٹرک، 3 بسیں اور 2 کاریں برآمد کی گئیں۔ اس کے علاوہ بڑی تعداد میں اسلحہ، گولہ بارود اور دھماکا خیز مواد بھی قبضے میں لے لیا گیا۔
سکیورٹی ذرائع کے مطابق دہشتگردوں نے این 25 پر چیک پوسٹ قائم کر رکھی تھی۔ اس چیک پوسٹ کا مقصد شہریوں کو اغوا کرنا، بھتہ وصول کرنا اور گاڑیاں چھیننا تھا۔
آئی ای ڈی حملہ
دوسری جانب خاران میں دہشتگردوں نے لجے روڈ پر ایک مسافر گاڑی کو آئی ای ڈی سے نشانہ بنایا۔ سکیورٹی ذرائع کے مطابق حملے میں 10 مزدور زخمی ہوگئے۔
سکیورٹی فورسز فوری طور پر جائے وقوعہ پر پہنچیں اور زخمیوں کو اسپتال منتقل کردیا۔ واقعے کے بعد علاقے میں سکیورٹی اقدامات مزید سخت کردیے گئے۔
دیکھیے: کوہاٹ حملہ افغانستان میں جڑیں رکھنے والے خوارج نے کیا: وزارت اطلاعات