اسلام آباد: صدر مملکت آصف علی زرداری کے چینی سفارتخانے کے مبینہ غیر اعلانیہ دورے کی اطلاعات سامنے آئی ہیں، تاہم سرکاری سطح پر اس کی تصدیق یا تردید نہیں کی گئی۔
سفارتی ذرائع کے مطابق صدر زرداری نے یہ دورہ اسلام آباد میں ہونے والے چار ملکی سفارتی مذاکرات کے بعد کیا، جسے حالیہ علاقائی صورتحال کے تناظر میں اہم پیشرفت قرار دیا جا رہا ہے۔
دوسری جانب صدارتی ترجمان نے اس حوالے سے واضح مؤقف اختیار کرتے ہوئے کہا کہ پالیسی کے تحت کسی بھی اہم ملاقات سے قبل پیشگی آگاہی فراہم نہیں کی جاتی، جبکہ ملاقات کی صورت میں بعد ازاں باضابطہ پریس ریلیز اور ویڈیو جاری کی جاتی ہے۔
ترجمان کے مطابق اس وقت کسی بھی ملاقات کی نہ تو تصدیق کی جا رہی ہے اور نہ ہی تردید، جس سے اس معاملے پر ابہام برقرار ہے۔
تجزیہ کاروں کے مطابق اگر یہ ملاقات ہوئی ہے تو اسے خطے میں جاری سفارتی سرگرمیوں اور پاکستان-چین قریبی تعلقات کے تناظر میں دیکھا جا سکتا ہے۔
دیکھئیے:پاکستان کی جانب سے ایران کے لیے ادویات اور ضروری اشیاء کی پہلی کھیپ روانہ