افغانستان کے شمالی صوبے سرپل میں طالبان حکومت کے خلاف مسلح مزاحمت کی ایک اور کارروائی کا دعویٰ سامنے آیا ہے۔ یونائیٹڈ فرنٹ آف افغانستان نے دعویٰ کیا ہے کہ اس کے جنگجوؤں نے ضلع کوہستانات جانے والی سڑک پر طالبان حکومت کی ملیشیا کے ایک رکن کو ہلاک کر دیا۔
گروپ کے مطابق کارروائی گزشتہ روز شام تقریباً 6 بجے اس وقت کی گئی جب مذکورہ طالبان اہلکار کوہستانات جانے والی سڑک پر موجود تھا۔ یونائیٹڈ فرنٹ کا کہنا ہے کہ اس کے جنگجوؤں نے اہلکار کو براہِ راست نشانہ بنایا، جس کے نتیجے میں وہ موقع پر ہی ہلاک ہوگیا۔
یہ واقعہ ایسے وقت میں سامنے آیا ہے جب افغانستان میں طالبان مخالف مسلح گروہوں نے اپنی کارروائیاں بڑھانے کے دعوے کیے ہیں۔ یونائیٹڈ فرنٹ نے یکم اگست سے طالبان کے خلاف باقاعدہ فوجی مہم شروع کرنے کا اعلان کیا تھا اور گزشتہ ایک ماہ کے دوران 14 صوبوں میں 43 کارروائیوں کا دعویٰ کرتے ہوئے 74 طالبان ارکان کی ہلاکت اور 35 کے زخمی ہونے کی بات کی ہے۔
سرپل بھی ان علاقوں میں شامل ہے جہاں طالبان مخالف گروہوں کی سرگرمیوں کے دعوے سامنے آتے رہے ہیں۔ حالیہ عرصے میں یونائیٹڈ فرنٹ سمیت دیگر مخالف گروہوں نے افغانستان کے مختلف صوبوں میں طالبان اہلکاروں اور تنصیبات کو نشانہ بنانے کے دعوے کیے ہیں۔
