اسلام آباد: سعودی عرب نے مشرق وسطیٰ کی کشیدہ صورتحال پر پاکستان کے مؤقف اور سفارتی کردار کو سراہتے ہوئے اسے ذمہ دارانہ اور دانشمندانہ قرار دیا ہے۔
پاکستان میں سعودی سفیر نواف بن سعید المالکی نے اپنے بیان میں کہا کہ خطے میں حالیہ حملے شدید تشویش کا باعث ہیں اور خلیجی ممالک کو نشانہ بنانا خودمختار ریاستوں کے خلاف بلاجواز جارحیت ہے۔
انہوں نے کہا کہ یہ اقدامات عالمی قوانین اور اقوام متحدہ کے اصولوں کی کھلی خلاف ورزی ہیں، جن کے نتیجے میں قیمتی جانیں ضائع ہوئیں جبکہ رہائشی علاقوں، شہری تنصیبات اور ہوائی اڈوں کو بھی نشانہ بنایا گیا۔
سعودی سفیر کے مطابق مشرق وسطیٰ میں استحکام برقرار رکھنا تمام ممالک کی مشترکہ ذمہ داری ہے، اور موجودہ بحران کا حل صرف دانشمندانہ فیصلوں اور عالمی یکجہتی میں ہے۔
نواف بن سعید المالکی نے پاکستان کے کردار کو سراہتے ہوئے کہا کہ پاکستان نے ذمہ دارانہ مؤقف اختیار کیا اور متوازن سفارتکاری کے ذریعے امن کے فروغ میں مثبت کردار ادا کیا۔
انہوں نے مزید کہا کہ عالمی قوانین اور انسانی اصولوں کی پاسداری ہی پائیدار امن اور سلامتی کی ضمانت ہے، اور اسی راستے پر چل کر خطے کو مزید عدم استحکام سے بچایا جا سکتا ہے۔
دیکھئیے:پاک افغان مذاکرات کا نیا دور: وفود چین روانہ، جنگ بندی اور سرحدی سلامتی پر اہم مذاکرات متوقع
