اسلام آباد: سعودی عرب کے وزیر خزانہ محمد الجدعان اسلام آباد پہنچ گئے جہاں ان کا استقبال پاکستان کے وزیر خزانہ محمد اورنگزیب اور سعودی سفیر نواف سعید المالکی نے کیا، دونوں ممالک کے درمیان معاشی تعاون کے فروغ پر بات چیت متوقع ہے۔
رپورٹس کے مطابق سعودی وزیر خزانہ کے دورے کے دوران سرمایہ کاری اور توانائی کے شعبے میں اہم پیش رفت زیر غور ہے، خاص طور پر گوادر میں مجوزہ آئل ریفائنری منصوبے کو آگے بڑھانے پر توجہ دی جا رہی ہے۔
ذرائع کے مطابق سعودی کمپنی آرامکو پاکستان میں 10 ارب ڈالر مالیت کی آئل ریفائنری کے منصوبے میں شراکت داری کرے گی، جس میں پاکستان اسٹیٹ آئل او جی ڈی سی ایل، پی پی ایل اور جی ایچ پی ایل شامل ہوں گی۔
اطلاعات کے مطابق اس منصوبے میں پاکستانی کمپنیوں کی سرمایہ کاری کا حصہ 40 سے 45 فیصد تک ہو سکتا ہے جبکہ مجوزہ ریفائنری یومیہ 3 لاکھ سے 4 لاکھ بیرل خام تیل پراسیس کرنے کی صلاحیت رکھے گی۔
حکام کا کہنا ہے کہ اس منصوبے سے پاکستان کے تیل درآمدی بل میں نمایاں کمی متوقع ہے اور توانائی کے شعبے میں خود انحصاری کو فروغ ملے گا۔
واضح رہے کہ گوادر آئل ریفائنری منصوبے کا اعلان 2019 میں کیا گیا تھا، جسے اب ٹیکس مراعات اور حکومتی حمایت کے ساتھ عملی شکل دینے کی پیش رفت جاری ہے۔