ریاض: امریکا، ایران اور اسرائیل کے درمیان جنگ بندی کے بعد سعودی عرب اور ایران کے وزرائے خارجہ کے درمیان پہلا باضابطہ ٹیلیفونک رابطہ ہوا ہے جس میں خطے میں کشیدگی کم کرنے اور استحکام کے فروغ پر زور دیا گیا۔
سعودی وزارت خارجہ کے مطابق سعودی وزیر خارجہ شہزادہ فیصل بن فرحان کو ایرانی وزیر خارجہ عباس عراقچی نے ٹیلی فون کیا جس میں دوطرفہ تعلقات اور خطے کی تازہ صورتحال پر تفصیلی تبادلہ خیال کیا گیا۔
اعلامیے میں کہا گیا کہ دونوں رہنماؤں نے موجودہ علاقائی حالات کے تناظر میں کشیدگی کم کرنے، استحکام کے اقدامات کو فروغ دینے اور سفارتی روابط کو جاری رکھنے کی اہمیت پر زور دیا۔
حکام کے مطابق یہ رابطہ ایسے وقت میں ہوا ہے جب خطے میں حالیہ جنگ بندی کے بعد سفارتی سرگرمیوں میں تیزی آئی ہے اور مختلف ممالک کشیدگی کے خاتمے کیلئے متحرک ہیں۔
واضح رہے کہ امریکا، ایران اور اسرائیل کے درمیان جنگ بندی کے بعد سعودی عرب اور ایران کے وزرائے خارجہ کے درمیان یہ پہلا سرکاری رابطہ ہے جسے علاقائی سفارتکاری میں اہم پیش رفت قرار دیا جا رہا ہے۔
دیکھئیے:وزیراعظم اور فیلڈ مارشل کی ملاقات، خطے میں پائیدار امن کیلئے ثالثی کردار جاری رکھنے کے عزم کا اعادہ