خیبر پختونخوا کے ضلع باجوڑ کے دمانگی کیمپ پر ہونے والے حالیہ مہلک ترین دہشت گردانہ حملے کی تحقیقات میں اہم پیش رفت سامنے آئی ہے۔ حملے میں ملوث دوسرے خودکش بمبار کی شناخت بھی ایک افغان شہری کے طور پر کر لی گئی ہے۔
محاذ کی رپورٹ کے مطابق دوسرے خودکش حملہ آور کا نام بیت اللہ عرف عاکف ہے، جس کا تعلق افغانستان کے صوبے وردک سے ہے۔ دہشت گرد تنظیم تحریکِ طالبان پاکستان نے اپنے ایک باضابطہ بیان میں اس خودکش بمبار کی شناخت حنین کے نام سے کی ہے۔ تحقیقاتی ادارے نے انکشاف کیا ہے کہ یہ دہشت گرد ماضی میں افغان طالبان کا باقاعدہ رکن بھی رہ چکا ہے۔
محاذ کی جانب سے جاری کردہ تصویری شواہد کے مطابق پہلی تصویر میں بیت اللہ کو افغانستان کے اندر ایک افغان فوجی چوکی پر دیکھا جا سکتا ہے، جبکہ آخری تصویر میں وہ اس حملے کے پہلے خودکش بمبار جلال الدین عرف سجاد کے ساتھ موجود ہے۔
محاذ نیوز کے مطابق تصاویر میں بیت اللہ کو کالعدم ٹی ٹی پی کے خصوصی خودکش اسکواڈ (اسپیشل سوئسائیڈ یونٹ) کا مخصوص ہیڈ بینڈ پہنے ہوئے بھی دیکھا جا سکتا ہے، جو اس بات کا واضح ثبوت ہے کہ باجوڑ حملے کی منصوبہ بندی اور اس پر عملدرآمد میں افغان سرزمین اور وہاں کے شہریوں کو استعمال کیا گیا۔
