وزیراعظم محمد شہباز شریف نے لندن میں اوورسیز پاکستانیوں کے کنونشن سے خطاب کیا۔
اوورسیز پاکستانیوں نے وزیر اعظم پاکستان شہباز شریف کا والہانہ انداز میں استقبال کیا۔ وزیر اعظم نے پوری پاکستانی قوم کی ترجمانی کرتے ہوئے خوبصورت اشعار پڑھ کر اوورسیز پاکستانیوں کی محنت اور ملک و قوم کی خدمت کے اعتراف میں بے پناہ محبت اور جذبات کا اظہار کیا۔
خطاب کے دوران وزیرِ اعظم شہبزشریف نے اوورسیز پاکستانیوں کو مباکباد پیش کرتے ہوئے کہا “آپریشن بُنْيَانٌ مَّرْصُوصٌ کی تاریخی کامیابی نے پاکستان کے وقار اور عزت کو ایسی بلندیوں پر پہنچایا جس کی مثال عصرِ حاضر کی تاریخ میں نہیں ملتی۔ اللہ تعالیٰ کے خاص انعام و اکرام اور افواج پاکستان کے عظیم ولولہ و شجاعت اور عسکری قیادت فیلڈ مارشل سید عاصم منیر کے دلیرانہ اور جُرأت مندانہ کردار کی وجہ سے اللہ تعالیٰ نے ہمیں یہ فتح نصیب کی”۔
وزیرِ اعظم پاکستان نے نے اوورسیز پاکستانیوں کو وہ عظیم سفیر کہا جو یورپ، برطانیہ، شمالی امریکہ اور مشرق وسطیٰ سمیت دنیا بھر میں دن رات محنت کرکے رزقِ حلال کماتے ہیں۔ شہباز شریف نے پچھلے سال ساڑھے 38 ارب ڈالر پاکستان بھیجنے پر اوورسیز پاکستانیوں کو سراہا۔
وزیرِ اعظم شہازشریف نے خطے میں امن و سلامتی قائم رکھنے پر زور دیتے ہوئے کہا “معرکہ حق کے آپریشن کے بعد سیز فائر ہوچکا اور اب ہم امن چاہتے ہیں، ہم ترقی وخوشحالی، ملک میں بیروزگاری کا خاتمہ اور سرمایہ کاری چاہتے ہیں۔ ہم کشمیر، پانی، تجارت اور کاؤنٹر ٹیررازم پر بات کرنا چاہتے ہیں اور برابری کی بنیاد پر بات کرکے یہ مسائل حل کرنا چاہتے ہیں تاہم کشمیر کا مسئلہ حل ہونا بنیادی ستون ہے۔ کشمیریوں کا خون رائیگاں نہیں جائے گا، انہیں اپنا حق ملے گا”۔
انہوں نے اپنا ویژن بتاتے ہوئے کہاں ہمیں قرضوں سے نجات حاصل کرنی ہو گی۔ پاکستان کی آبادی کا 60 فیصد حصہ یوتھ پر مشتمل ہے، ہم نے نوجوانوں کے لیے پاکستان میں خصوصی آئی ٹی ٹریننگز کا آغاز کر دیا ہے تاکہ پاکستان کو ایک خودمختار ریاست بنایا جا سکے اور قرضوں سے چھٹکارا حاصل کیا جا سکے۔
اور اس کے علاوہ وزیرِ اعظم پاکستان نے غزہ کی صورحال پر پُر زور مذمت کرتے ہوئے کہ غزہ میں جو اس وقت ظلم و ستم کیا جا رہا ہے، 64 ہزار سے زائد افراد شہید ہو چکے ہیں جس میں بچے، خواتین اور بزرگ شامل ہیں جب کہ جو زندہ ہیں ان کا کھانا, پانی اور ادویات تک بند کر دی گئی ہیں، غزہ کی پٹی کے تناسب سے جتنی شہادتیں ہو چکی ہیں، پچھلے 100 سال کے دوران ہونے والی جنگوں میں بھی اتنی زندگیاں تباہ نہیں ہوئیں۔ میں سمجھتا ہوں کہ اب وقت آ گیا ہے کہ اس خطے کو امن چاہیے جس کے لیے اسلامی ممالک کو آگے بڑھ کر اپنا کردار ادا کرنا چاہیے۔
دیکھیں: وزیراعظم شہباز شریف نیویارک میں اقوام متحدہ کی جنرل اسمبلی کے اجلاس میں شریک ہوں گے