وائٹ ہاؤس نے امریکی صدر ڈونلڈ ٹرمپ کے آئندہ دورۂ چین کی باقاعدہ تاریخوں اور ایجنڈے کا اعلان کر دیا ہے۔ ترجمان وائٹ ہاؤس کے مطابق صدر ٹرمپ بدھ کی شام بیجنگ پہنچیں گے، جہاں چینی قیادت ان کا پرجوش استقبال کرے گی۔
دورے کے شیڈول کے مطابق بیجنگ آمد کے اگلے روز یعنی جمعرات کی شام صدر ٹرمپ کے اعزاز میں ایک پروقار عشائیہ دیا جائے گا، جس میں دونوں ممالک کی اعلیٰ قیادت شرکت کرے گی۔ وائٹ ہاؤس کا کہنا ہے کہ اس دورے کا بنیادی مقصد دونوں عالمی معیشتوں کے درمیان تعاون کے نئے راستے تلاش کرنا ہے۔
ترجمان نے مزید بتایا کہ دورے کے دوران امریکہ اور چین ایک “مشترکہ تجارتی اور سرمایہ کاری بورڈ” کے قیام پر کام کریں گے، جس سے دوطرفہ تجارت کو منظم کرنے میں مدد ملے گی۔
اس کے علاوہ ایرو اسپیس، زراعت اور توانائی کے کلیدی شعبوں میں تعاون بڑھانے کے حوالے سے بھی تفصیلی بات چیت کی جائے گی۔ عالمی ماہرین اس دورے کو عالمی معیشت اور تجارتی استحکام کے لیے انتہائی اہمیت کا حامل قرار دے رہے ہیں۔