بلوچستان: تربت میں بدامنی کا ایک اور افسوسناک واقعہ سامنے آیا ہے، جہاں نامعلوم مسلح افراد نے ایک گاڑی کو نشانہ بنایا ہے۔ فائرنگ کے اس ہولناک واقعے میں ڈیوٹی پر مامور لیڈی کانسٹیبل موقع پر ہی جاں بحق ہو گئیں، جبکہ ان کے خاندان کے دو افراد شدید زخمی ہوئے ہیں۔
مقامی پولیس حکام کے مطابق یہ واقعہ تربت کے نواحی علاقے آبسر میں پیش آیا، جہاں گھات لگائے بیٹھے لگائے بیٹھے نامعلوم مسلح ملزمان نے وہاں سے گزرنے والی گاڑی پر اندھا دھند فائرنگ کر دی۔ فائرنگ کی زد میں آ کر گاڑی میں سوار لیڈی کانسٹیبل جاں بحق ہو گئیں، جبکہ گاڑی میں موجود ان کے شوہر اور 5 سالہ معصوم بیٹے کو بھی گولیاں لگیں، جس سے وہ شدید زخمی ہو گئے۔
واقعے کی اطلاع ملتے ہی پولیس اور قانون نافذ کرنے والے اداروں کے اہلکار فوری طور پر جائے وقوعہ پر پہنچ گئے اور علاقے کو گھیرے میں لے لیا۔ سکیورٹی فورسز نے لاش اور دونوں زخمیوں کو فوری طور پر قریبی اسپتال منتقل کیا، جہاں زخمیوں کو طبی امداد فراہم کی جا رہی ہے۔ ہسپتال ذرائع کے مطابق زخمی ہونے والے بچے اور اس کے والد کی حالت تشویشناک بتائی جاتی ہے۔
قانون نافذ کرنے والے اداروں نے جائے وقوعہ سے شواہد اکٹھے کر کے ملزمان کی گرفتاری کے لیے علاقے میں ناکہ بندی کر دی ہے اور وسیع پیمانے پر سرچ آپریشن کا آغاز کر دیا گیا ہے، تاہم ابھی تک کسی گروپ نے اس حملے کی ذمہ داری قبول نہیں کی ہے۔
