ترکیہ نے سعودی عرب کے ساتھ مشترکہ دفاعی معاہدے کے تحت فوجی اہلکار تعینات کرنے کا فیصلہ کیا ہے۔ مجوزہ تعیناتی کے لیے ترک پارلیمنٹ میں قرارداد پیش کی جائے گی۔
رائٹرز کے مطابق، ترک حکمران جماعت کے ایک رکن پارلیمنٹ نے بتایا کہ معاہدے کی توثیق کے بعد فوجی تعیناتی کی قرارداد پارلیمنٹ میں پیش کی جائے گی۔
رائٹرز کے مطابق سعودی عرب میں تعینات ہونے والے ترک فوجی ابتدائی طور پر فضائی دفاع اور الیکٹرانک جنگ کے شعبوں میں معاونت کریں گے۔
رپورٹ کے مطابق معاہدے کے تحت بیرون ملک تعینات ترک فوجی اہلکار جارحانہ کارروائیوں میں حصہ نہیں لیں گے۔ تاہم، فوجیوں کی تعداد اور تعیناتی کے حتمی وقت کی تفصیلات سامنے نہیں آئیں۔
رائٹرز کے مطابق ترکیہ نے بحیرۂ احمر میں بحری جہازوں کی حفاظت کے لیے سعودی اتحاد میں شامل ہونے پر بھی اتفاق کیا ہے۔
اس پیش رفت کے بعد ترکیہ اور سعودی عرب کے درمیان دفاعی تعاون میں مزید اضافے کا امکان ہے۔ تاہم، فوجی تعیناتی کے لیے ترک پارلیمنٹ میں قرارداد پیش کیے جانے سمیت متعلقہ کارروائی ابھی باقی ہے۔
