ازبکستان نے افغانستان سے متصل سرحدی علاقے میں ایک بڑی کارروائی کرتے ہوئے منشیات اسمگل کرنے کی کوشش ناکام بنا دی ہے اور دو کلوگرام سے زائد افیون قبضے میں لے لی ہے۔ ازبک حکام کے مطابق سرحدی نگرانی کی تاریخ میں یہ پہلا موقع ہے جب افغانستان سے ڈرون کے ذریعے اسمگلنگ کی کوئی کارروائی سامنے آئی ہے۔
ازبک سکیورٹی حکام کے مطابق نامعلوم افراد نے دریائے آمو کے افغان کنارے سے ایک کواڈ کاپٹر ڈرون کے ساتھ دو کلوگرام اور 32 گرام افیون باندھ کر اسے ازبکستان کے صوبہ سرخندریا کی جانب روانہ کیا تھا۔ تاہم سرحد پر تعینات سکیورٹی فورسز نے فوری ردعمل کا اظہار کرتے ہوئے ڈرون کو اس کی منزل تک پہنچنے سے پہلے ہی مار گرایا اور منشیات کی کھیپ برآمد کر لی۔
سکیورٹی سروس نے واقعے کا فوجداری مقدمہ درج کر کے تفتیش شروع کر دی ہے جس کے تحت ڈرون کے لانچنگ مقام، منشیات کی متوقع منزل اور سرخندریا میں موجود ممکنہ سہولت کاروں کا تعین کیا جائے گا۔
ازبک حکام کا کہنا ہے کہ افغانستان میں طالبان کے دوبارہ برسرِ اقتدار آنے کے بعد سرحد پر منشیات کی متعدد کھیپیں پکڑی جا چکی ہیں، تاہم اسمگلنگ کے لیے ڈرون ٹیکنالوجی کا یہ پہلا استعمال ہے جو سیکورٹی اداروں کے لیے ایک نیا چیلنج ہے۔
