وزیرِاعلیٰ بلوچستان میر سرفراز بگٹی نے کہا ہے کہ چیلنجز کے باوجود موجودہ حکومت نے تعلیم کو اپنی اولین ترجیح بنایا ہے۔ 1 سال میں 8 ہزار 500 نئے اساتذہ کو میرٹ پر بھرتی کیا گیا۔
عالمی یومِ خواندگی کے موقع پر کوئٹہ سے جاری کیے گئے اپنے پیغام میں انہں نے کہا کہ 1200 سے زائد بند اسکول دوبارہ فعال کیے اور 90 ہزار بچے زیورِ تعلیم سے آراستہ ہوئے۔
وزیرِ اعلیٰ بلوچستان سرفراز بگٹی نے کہا کہ صوبے میں بینظیر بھٹو اسکالر شپ پروگرام متعارف کرایا گیا ہے، آنے والے مالی سال میں 1200 نئے کمیونٹی اسکول قائم کیے جائیں گے۔
انہوں نے یہ بھی کہا کہ اس سے مزید ڈیڑھ لاکھ سے زائد بچوں کو تعلیم تک رسائی ملے گی۔
دوسری جانب بلاول بھٹو نے عالمی یومِ خواندگی پر اپنے پیغام میں کہاکہ اُن کی جماعت کا یقین ہے کہ غربت، ناانصافی اور جہالت کی زنجیروں کو توڑنے کا سب سے طاقتور ہتھیار تعلیم ہے۔ پاکستانی بچوں کو تعلیم کے اپنے بنیادی حق کے حصول میں ان مشکلات کا سامنا کرنا پڑ رہا ہے جو موسمیاتی تبدیلی کے سبب پیدا ہوئی ہیں، جو کہ ایک ایسا بحران ہے جس میں نہ ان بچوں کا، نہ ان کے والدین اور نہ ہی اُن کے ملک کا کوئی قصور ہے کیونکہ اس کی جڑیں صنعتی ممالک کے اقدامات میں پیوست ہیں۔
چیئرمین بلاول بھٹو زرداری نے خواندگی اور تعلیم کیلئے اپنی جماعت کے غیر متزلزل عزم کا اعادہ کیا اور زور دیا کہ پاکستان میں شرحِ خواندگی بڑھانے کیلئے قومی سطح پر اجتماعی کاوشوں کی ضرورت ہے ، جس کیلئے ہر شہری، بشمول حکومت اور سول سوسائٹی کو مل کر اپنا کردار ادا کرنا ہوگا۔
بلا ول بھٹو زرداری سیلاب متاثرین سے ملنے کیلئے گزشتہ شام ملتان پہنچ گئے ، گورنر پنجاب سردار سلیم حیدر بھی ان کے ہمراہ ہیں۔ چیئرمین سینیٹ سید یوسف رضا گیلانی، ایم این اے سید علی قاسم گیلانی اور دیگر رہنماؤں نے ان کا ملتان ائیرپورٹ پر استقبال کیا،وہ مظفرگڑھ کا دورہ بھی کریں گے ۔
دیکھیں: عالمی بینک نے پنجاب میں پرائمری تعلیم کیلئے 4 کروڑ 79 لاکھ ڈالر کی منظوری دیدی