چترال : 20 جون ثقافتی سیاحت2025
شندور فیسٹیول کا آغاز جمعہ کے روز اپر چترال میں ہوا، جہاں ثقافتی سیاحت کو بھرپور انداز میں اُجاگر کیا گیا۔ خیبر پختونخوا ٹورازم اتھارٹی نے پاکستان آرمی اور چترال اسکاؤٹس کے تعاون سے اس ثقافتی پروگرام کا انعقاد کیا، جس میں بڑی تعداد میں عوام الناس نے شرکت کی اپر چترال و گردونواح کی عوام کے جوش و خروش کی بدولت تین روزہ تقریبات کا شاندار آغاز کردیاگیا۔
ثقافتی سیاحت اور خطے کی پہچان
افتتاحی تقریب کے مہمانِ خصوصی مشیر اطلاعات بیرسٹر سیف، وزیر کھیل فخر جہان تھے۔ بیرسٹر سیف نے خیبر پختونخوا کو ایک پرامن صوبہ قرار دیا۔انکا کہنا تھا کہ یہاں ثقافتی سیاحت کو فروغ دے کر معاشی ترقی کے نئے دروازے کھولے جا سکتے ہیں۔ انہوں نے شندور جیسے بین الاقوامی معیار کےپروگرامات کو صوبے کی پہچان قرار دیا۔
تقریب میں سیکریٹری سیاحت بختیار خان، کمشنر ملاکنڈ عابد وزیر، اور ڈی جی ٹورازم حبیب اللہ عارف بھی موجود تھے، جنہوں نے سیاحتی اور ثقافتی سرگرمیوں کے متعلق حکومت کے کردار کو سراہا۔
سیاحوں کا جوش و خروش
افتتاحی میچ میں سرلاسپور (چترال) اور غذر (گلگت بلتستان) کی ٹیموں نے شرکت کی، جس میں سرلاسپور نے فتح حاصل کی۔ شندور پولو گراؤنڈ جسے دنیا کی چھت بھی کہا جاتا ہے۔ ایک بار پھر روایت پسند لوگوں کےلیے توجہ کا محور و مرکز بنا۔
پولو کے ساتھ ساتھ علاقائی موسیقی، رقص، کھانوں اور دستکاریوں کے اسٹالز بھی لگائے گئے ہیں۔جو ثقافتی سیاحت کے فروغ کا اہم ذریعہ ہیں۔
دوستانہ روابط
شندور فیسٹیول نہ صرف کھیل کو فروغ دیتا ہے بلکہ چترال اور گلگت بلتستان کے درمیان دوستانہ تعلقات و بھائی چارگی کے تعلقات کو بھی مضبوط کرتا ہے۔ صوبہ خیبر پختونخواہ کی کوشش ہے کہ ثقافتی سیاحت کے ذریعے نہ صرف علاقائی ورثے کو محفوظ بنایاجائے بلکہ مقامی معیشت کو بھی فعال بنایا جائے۔
