جنوبی وزیرستان اپر کے بدر وادی میں سیکیورٹی فورسز کے قافلے پر گھات لگا کر حملہ کیا گیا، جس کے نتیجے میں کم از کم 12 اہلکار شہید اور 4 شدید زخمی ہوگئے۔ حکام نے اس المناک واقعے کی تصدیق کرتے ہوئے بتایا کہ زخمیوں کو قریبی فوجی اسپتال منتقل کر دیا گیا ہے، جہاں ان کی حالت نازک بتائی جا رہی ہے۔
اطلاعات کے مطابق تحریک طالبان پاکستان (ٹی ٹی پی) نے اس حملے کی ذمہ داری قبول کر لی ہے۔ تنظیم نے دعویٰ کیا ہے کہ اس کے جنگجوؤں نے کارروائی کے دوران سیکیورٹی فورسز کے ہتھیار بھی قبضے میں لے لیے۔
یہ واقعہ جنوبی وزیرستان اپر میں سیکیورٹی فورسز پر گزشتہ ایک سال کے دوران سب سے مہلک حملہ ہے۔ دسمبر 2024 میں بھی اسی علاقے میں ٹی ٹی پی کے ایک حملے میں 16 اہلکار شہید ہوئے تھے، جس کے بعد پاکستان نے افغانستان کے اندر فضائی کارروائیاں کی تھیں۔
تجزیہ کاروں کا کہنا ہے کہ اس تازہ حملے سے خطے میں سیکیورٹی صورتحال مزید کشیدہ ہوسکتی ہے۔ حکام نے حملے کی تحقیقات شروع کر دی ہیں جبکہ سرچ آپریشن بھی جاری ہے۔
دیکھیں: سیکیورٹی فورسز کا شمالی وزیرستان میں آپریشن جاری؛ 8 دہشت گرد ہلاک