افغان وزارتِ دفاع نے پاکستان کے ساتھ حالیہ معاہدے کے حوالے سے وضاحت جاری کرتے ہوئے کہا ہے کہ معاہدے کی تمام تفصیلات افغان وزیرِ دفاع کی پریس کانفرنس میں پیش کر دی گئی تھیں اور وہی حتمی وضاحت ہے۔ وزارت کے ترجمان کے مطابق، اس معاہدے میں دونوں ممالک کے درمیان باہمی احترام، سرحدی سیکیورٹی، اور اعتماد کی فضا قائم رکھنے پر اتفاق کیا گیا ہے۔
ترجمان نے مزید کہا کہ معاہدے کے تحت دونوں ممالک نے طے کیا ہے کہ کسی بھی ملک کی سرکاری یا فوجی تنصیبات پر حملہ نہیں کیا جائے گا اور تمام مسائل کو مذاکرات اور سفارتی ذرائع کے ذریعے حل کیا جائے گا۔ بیان میں یہ بھی کہا گیا کہ فریقین نے ایک دوسرے کے خلاف کسی گروہ یا عسکری کارروائی کی حمایت نہ کرنے پر اتفاق کیا ہے۔
افغان وزارتِ دفاع نے زور دیا کہ اگر کوئی شخص یا ادارہ اس معاہدے کے بارے میں متضاد یا اضافی بیانات جاری کرتا ہے تو وہ حقائق پر مبنی نہیں ہیں۔
یہ وضاحت ایسے وقت میں سامنے آئی ہے جب پاکستان کے وزیرِ دفاع خواجہ آصف نے ایک روز قبل بیان دیا تھا کہ جنگ بندی اس شرط سے مشروط ہے کہ افغان طالبان پاکستان پر حملہ کرنے والے دہشت گردوں کو قابو میں رکھیں۔ ان کا کہنا تھا کہ سرحد پار دہشت گردی کا سلسلہ بند ہونا ضروری ہے تاکہ خطے میں امن قائم رہے۔
دوسری جانب، افغان حکومت کو پاکستان میں بعض حلقوں کی جانب سے اس بات پر تنقید کا سامنا ہے کہ وہ پاک افغان سرحد کو “بین الاقوامی سرحد” تسلیم کرنے سے گریزاں ہے۔ مبصرین کے مطابق، یہ حالیہ معاہدہ اگر خلوص نیت سے نافذ کیا جائے تو دونوں ممالک کے درمیان بڑھتی ہوئی کشیدگی میں کمی لانے اور امن و استحکام کے لیے ایک مثبت قدم ثابت ہو سکتا ہے۔
دیکھیں: پاک افغان جنگ بندی؛ خلاف ورزی کی صورت میں معاہدہ ختم سمجھا جائے، خواجہ آصف
