سعودی عرب میں افغانستان، پاکستان اور سعودی عرب کے وزرائے صحت کے درمیان سہ فریقی ملاقات میں منشیات کے استعمال کی روک تھام اور شعبۂ صحت میں باہمی تعاون پر اتفاق کیا گیا۔
تفصیلات کے مطابق افغان وزیر صحت مولوی نور جلال جلالی نے سعودی عرب کے دورے کے دوران سعودی ہم منصب فہد عبدالرحمٰن الجلاجیل سے ملاقات کی جس میں پاکستان کے وزیر صحت بھی موجود تھے۔
افغان وزارت صحت کے مطابق مذکورہ ملاقات میں امراض کی روک تھام، منشیات سے بچاؤ، ادویات کے معیار سمیت صحت کے دیگر شعبوں میں باہمی تعاون پر غور کیا گیا۔
مولوی نور جلال جلالی نے اس موقع پر کہا کہ افغانستان سے پولیو کے مکمل خاتمے کے لیے علاقائی سطح پر مشترکہ کاوشیں ناگزیر ہیں۔ انہوں نے مزید کہا کہ افغان وزارت صحت بیماریوں کی روک تھام اور صحت کے معیار کو بہتر بنانے کے لیے مشترکہ منصوبوں کو مزید مؤثر بنائے گی۔
سعودی عرب اور پاکستان کے وزرائے صحت نے پولیو کے خاتمے، منشیات کے خلاف اقدامات اور افغان صحت کے اداروں سے تعاون جاری رکھنے ہر اتفاق کیا۔
دیکھیں: پاکستان اور سعودی عرب کے درمیان 6 ارب ڈالر کے اقتصادی معاہدے پر اتفاق