ڈیرہ اسماعیل خان میں دہشتگردی کا ایک افسوسناک اور قابلِ مذمت واقعہ پیش آیا ہے، جہاں پولیس چوکی ٹکواڑہ کی بکتر بند گاڑی کو ایک طاقتور آئی ای ڈی دھماکے کا نشانہ بنایا گیا۔ یہ حملہ ہتھالہ گلوٹی روڈ پر کڑی ملنگ کے قریب اس وقت ہوا جب نامعلوم دہشتگردوں نے سڑک کنارے نصب بارودی مواد کو ریموٹ کنٹرول کے ذریعے دھماکے سے اڑا دیا۔
دھماکے کے نتیجے میں دو بہادر اہلکار جامِ شہادت نوش کر گئے جبکہ چار اہلکار زخمی ہوئے، جنہیں فوری طور پر قریبی ہسپتال منتقل کر کے طبی امداد فراہم کی جا رہی ہے۔ شہداء میں کانسٹیبل سیف الرحمن اور گاڑی کے ڈرائیور رمضان شامل ہیں۔ زخمی ہونے والے اہلکاروں میں محبوب عالم، آصف رحمان، پولیس اہلکار کفایت اور ایف سی کے حوالدار شاہد شامل ہیں۔
واقعہ کے فوراً بعد سیکیورٹی فورسز نے علاقے کو گھیرے میں لے کر سرچ آپریشن شروع کر دیا ہے جبکہ شواہد اکٹھے کر کے تحقیقات جاری ہیں۔ خطرناک نوعیت کا یہ حملہ ایک بار پھر ظاہر کرتا ہے کہ سیکیورٹی اہلکار اپنی جانوں کو خطرے میں ڈال کر ملک میں امن و امان کی بحالی کے لیے بہادری سے ڈٹے ہوئے ہیں۔
دیکھیں: اسلام آباد: خودکش حملے میں 12 افراد شہید، وزیرِ داخلہ کا سخت انتباہ